Urugendo rwa Real Madrid muri UEFA Champions league rwarangijwe na Ajax
Ikipe ya Real Madrid yo mu gihugu cya Espagne yaraye isezerewe mu mikino ya UEFA Champions league y’uyu mwaka, nyuma yo kwandagazwa na Ajax Amsterdam yo mu Buholandi yayisanze i Santiago Bernabeu ikahayitsindira ibitego 4-1.
Hari mu mukino wo kwishyura nyuma y’umukino ubanza 1/8 cy’irangiza wari wabereye mu kuri Stade yitiriwe Johan Cruyff ukarangira Real Madrid ihatsindiye ibitego 2-1.
Ikipe ya Real Madrid ntiyarifite Sergio Ramos usanzwe ari Kapiteni wayo, ari na cyo cyayishegeshe cyane mu ijoro ryakeye.
Muri rusange umukino ku mpande zombi wari ufunguye, ari na ko amakipe yombi agerageza uburyo bw’ibitego imbere y’izamu.
Ajax Amsterdam yakinaga ituje yafunguye amazamu bwa mbere ku munota wa 07 w’umukino ibifashijwemo n’Umunya-Maroc Hakim Ziyech. Ni ku mupira mwiza yari ahawe naDušan Tadić ukomoka mu gihugu cya Serbia.
Ku munota wa 18 w’umukino Ajax yongeye kubona igitego cya kabiri cyatsinzwe na David Neres, nanone ku mupira mwiza yari ahawe na Tadić wari wabanje gucenga ab’inyuma ba Real Madrid bose.
Igice cya mbere cy’umukino cyarangiye Real Madrid yatsinzwe ibitego 2-0.
Iyi kipe y’umutoza Santiago Solari yaje kugira ibyago mu gice cya mbere, ivunikisha Lucas Vasquez na Vinicius Jr bayifashaga cyane ku byerekeye ubusatirizi. Real Madrid yanabonye uburyo bw’ibitego, harimo umupira Rafael Varane yateye n’umutwe ukagarurwa n’umutambiko, ndetse n’indi mipira yagiye ikurwamo n’umuzamuAndré Onana ukomoka muri Cameroon.
Igice cya kabiri cy’umukino nanone cyaranzwe no gusatirana cyane ku mpande zombi. Abasore barimo Karim Benzema, Gareth Bale na Marco Asensio bakoze ibishoboka byose ngo bagarure Real Madrid mu mukino, gusa ubwugarizi bwa Ajax bwari buyobowe na Kapiteni Matis De Ligt bukayibera ibamba.
Iyi kipe yo mu gihugu cy’Ubuholandi yashimangiye gahunda yo gukomeza muri 1/4 yari ifite itsinda igitego cya gatatu. Ni igitego cyatsinzwe na Dusan Tadic wari wazonze cyane Real Madrid. Hari ku munota wa 62.
Ku munota wa 70 w’umukino Marco Asensio yaboneye Real Madrid impozamarira, mbere y’uko ku munota wa 72 Lasse Schöne atera Coup-Franc y’akataroneka yahesheje Ajax igitego cya kane.
Insinzi ya Ajax yahise ikuraho agahigo ko kuba mu myaka itanu ishize Real Madrid yaratwayemo UEFA Champions league enye, harimo Eshatu zikurikiranya.
Muri rusange Real Madrid yasezerewe ku giteranyo cy’ibitego 5-3, mu gihe Tottenham yagiye gutsindira Dortimund mu Budage 1-0 birangira inayisezereye ku giteranyo cy’ibitego 4-0.
