Umutoza wa Manchester United hari icyo yizeje abafana bayo mu mikino ya Champions League
Ole Gunnar Solskjaer, umutoza w’agateganyo wa Manchester United, yanayikiniye mu myaka 11 ishize, avuga ko ikipe ari gutoza ishobora kugera kure hashoboka nyuma yaho itomboreye kuzakina na FC Barcelona mu mikino ya kimwe cya kane cya Champions League.
Iyi tombola igiye gutuma Ole Gunnar asubira ku kibuga Nou Camp cya Barcelona yaherukagaho mu myaka 20 ishize ubwo yahatsindiraga igitego cy’intsinzi cyo mu minota y’inyongera mu mukino wa nyuma wa Champions League wo mu mwaka wa 1999.
Ole Gunnar yagize ati: “Ndatekereza ko ubwo twahuraga na Paris Saint-Germain, twagaragaje ko ku munsi uwo ari wo wose dushobora gutsinda ikipe yo ku rwego rwo hejuru”.
“Ikipe iyo ari yo yose ishobora gutsinda indi muri kimwe cya kane. Haracyarimo umupira wo ku rwego rwo hejuru cyane. Birumvikana, mu gihe hakirimo Cristiano [Ronaldo], ntabwo ntekereza ko ibintu byoroshye cyane”.
Ole Gunnar mu kiganiro n’itangazamakuru yakomeje agira ati: “Hari ibintu byinshi bishoboka kandi iyi mikino [ya kimwe cya kane] izacyemurwa n’utuntu duto duto…”
“Nemera ko mu buzima, mu mikino, umuntu abona icyo akwiye. Iyo ukoze cyane, ukitwara neza, iyo buri munsi ukoze neza, biguha amahirwe yose ashoboka, Rero yego, dushobora kugera kure hashoboka, ariko bisaba no guhirwa ndetse no gukora neza mu nzira yose”.
Uyu Munya-Norvège w’imyaka 46 y’amavuko, yanditse amateka muri Champions League ubwo ikipe ye yabaga iya mbere ishoboye gusezerera iyari yayitsindiye iwayo ibitego 2-0 cyangwa birenga mu mukino ubanza, ubwo yatsindaga Paris St-Germain ibitego 3-1 mu mukino wo kwishyura.
