Umunyarwandakazi Sherrie Silver mu masezerano n’ uruganda rwa Nike
Sherrie Silver umunyarwandakazi wabaye icyamamare kubera ibikorwa byo kubyina yagize umwuga yatangiye gahunda yo kwamamariza uruganda rukora imyenda n’inkweto rwa Nike.
Uyu mukobwa w’imyaka 24 ukomoka mu Karere ka Huye abinyujije ku rubuga rwa Instagram, Sherrie Silver yatangiye kwamamariza uruganda rukora imyenda n’inkweto rukomeye ku Isi rwa Nike aho yatangiye yamamaza inkweto ya yo mu bwoko bwa Air Force 11 Rebbel XX.
Iyi nkweto Air Force 11 Rebbel XX, Sherrie Silver yatangiye yamamaza izajya hanze ku wa 06 Ukuboza 2018 ni inkweto igenewe igitsina gore izifashishwa muri siporo.
Uru ruganda rwa Nike rukunze kwifashisha ibyamamare bikomeye ku Isi mukwamamaza ibikorwa byarwo , mu bazwi cyane uru ruganda rukorana nabo barimo Cristiano Ronaldo , Libron James n’abandi.
Sherrie Silver ageze kuri ibi nyuma yo kwegukana igihembo cya MTV Video Music Awards akesha kuyobora imbyino ziri mu ndirimbo yakunzwe cyane hirya no hino ku Isi “This is America” ya Childish Gambino.
Uyu mukobwa aherutse gushyirwa ku rutonde rw’urubyiruko ruvuga rikijyana muri Afurika, ndeste hari n’ikindi gihembo yahawe cyiswe Africa Pride Awards yahawe nk’umubyinnyi w’umunyafurika wahize abandi ku mu gabane wa Afurika.
