AmakuruImikino

Uko ikipe y’igihugu Amavubi yagiye yitwara mu mikino yagiye iyihuza na Cote d’Ivoire

Kuri iki cyumweru, ruraza kwambikana hagati y’Amavubi y’u Rwanda n’inzovu za Cote d’Ivoire. Ni mu mukino wa kabiri ubanza w’itsinda H mu ijonjora ryo gushaka itike y’igikombe cya Afurika kizabera muri Cameroon umwaka utaha.

Uyu mukino uzabera kuri Stade ya Kigali saa cyenda n’igice zo ku cyumweru. Amasaha atageze kuri 48 ni yo abura ngo impande zombi zitane mu mitwe.

Abakinnyi b’Amavubi, Rwatubyaye Abdoul, Salomon Nirisarike, Haruna Niyonzima, Umutoza Mashami Vincent n’abandi barahiriye kwegukana amanota atatu ku kabi n’akeza. Bati “Cote d’ivoire ni ikipe twubaha, gusa kugusanga iwawe ikahagutsindira byaba ari agasuzuguro.”

Ese inzozi aba bakinnyi n’umutoza wabo bafite zirashoboka, Cyangwa ni ukwikina nk’uko bamwe bakunze kubivuga?

Teradignews.rw twasubije amaso inyuma tureba ibyagiye biva mu mikino yagiye ihuza aya makipe yombi mu myaka yashize.

Mu kureba iyi mikino, twibanze kuyahuje aya makipe yombi kuva mu mwaka wa 2000.

Kuva muri uyu mwaka, amakipe yombi yahuye incuro 7 mu marushanwa atandukanye ndetse n’imikino ya gicuti.

Cote d’Ivoire ni yo yatsinzemo imikino myinshi(4) u Rwanda rutsinda 2 harimo n’uheruka guhuza aya makipe yombi, mu gihe banganyije umukino umwe.

Iyi mikino ka tuyihere ku mukino amakipe yombi yahuyemo ku wa 09 Mata 2000. Muri uyu mukino, amakipe yombi yahuriye kuri Stade Amahoro mu ijonjora ryo gushaka itike y’igikombe cy’Isi. Uyu mukino warangiye amakipe yombi aguye miswi 2-2.U

Ku wa 23 Mata 2000, amakipe yombi yahuriye mu mukino wo kwishyura wabereye Yamoussukro muri Cote d’ivoire. Uyu mukino warangiye Cote d’ivoire itsinze u Rwanda ibitego 2-0.

Nyuma y’iyi mikino 2 yo muri 2000, amakipe yombi yamaze imyaka igera ku 10 atarahurira mu irushanwa iryo ari ryo ryose. Yongeye guhura ku wa 07 Mutarama 2010, mu mukino wa gicuti wabereye i Abidjan. Uyu mukino warangiye Cote d’ivoire itsinze Amavubi ibitego 2-0.

Tariki ya 04 Nzeri 2010 na bwo Amavubi y’u Rwanda yacakiranye n’inzovu za Cote d’ivoire mu mukino wo gushaka itike y’igikombe cya Afurika. Mu mukino wabereye muri Cote d’Ivoire, iyi kipe yari ifite ba Gervinho na Drogba babicaga bigacika yatsinze Amavubi ibitego 3-0.

Nyuma y’uyu mukino u Rwanda na Cote d’ivoire bahuriye mu mukino wa gicuti wo ku wa 28 Ugushyingo 2011. Uyu mukino warangiye u Rwanda rutsinze Cote d’ivoire ibitego 2-1. Ni umukino wari wabereye i Kigali.

Nyuma aya makipe yongeye guhura mu mukino wo ku itariki ya 03 Nzeri 2011. Muri uyu mukino, Cote d’ivoire yasanze Amavubi i Kigali ihayatsindira ibitego 5-0. Hari mu mukino wo gushaka itike y’igikombe cya Afurika. Abanyarwanda barebye uyu mukino ntibazibagirwa abasore barimo Salomon Kalou, Gervinho, Didier Yakonan n’abandi.

Umukino wa nyuma uheruka guhuza aya makipe yombi ni uwabaye Tariki ya 16 Mutarama 2016. Hari mu mukino ufungura CHAN yaberaga mu Rwanda. Coup-Franc ya Emery Bayisenge ni yo yatandukanyije impande zombi, Amavubi yegukana  amanota 3 atyo.

Twitter
WhatsApp
FbMessenger