Uganda : Ntawemerewe kwinjira mu nteko ishingamategeko atarakingiwe COVID-19
Muri iki gihe Isi n’abayituye bakomeje gukora ibishoboka byose ngo harwanywe icyorezo cya COVID-19 muri Uganda ho guhera kuri uyu wa Mbere, itariki 1 Ugushyingo, abadepite, abakozi n’abasura inteko ishinga amategeko bikingije Covid-19 nibo bemerewe kuyinjiramo gusa.
Mu itangazo rigenewe abadepite bose n’abakozi b’inteko ishingamategeko ryasohowe na Waiswa Henry Yoweri mu izina ry’umwanditsi mukuru w’inteko, Adolf Mwesigye, abadepite n’abakozi bamenyeshejwe ko aya mabwiriza mashya yatanzwe na visi perezida w’inteko, Anita Among.
Itangazo rigira riti “ Ba nyakubahwa badepite n’abakozi, mu rwego rw’amabwiriza ya Nyakubahwa Visi Perezida w’Inteko, muramenyeshwa ko kuva kuri uyu wa Mbere, itariki 1 Ugushyingo 2021, kwinjira mu nyubako z’inteko bizaba byemerewe abantu bikingije Covid-19 bonyine,”
Muri iri tangazo kandi hari aho rivuga ko Inteko ishinga amategeko ari urwego rw’ingenzi mu kurwanya Covid-19, kubw’ibyo abayigize n’abakozi bakaba bagomba kubera urugero abandi mu gushyigikira gahunda z’ubuzima za leta.
Itangazo kandi rivuga ko iki cyemezo cyafashwe nyuma yo kubyemeranywaho n’umukuru w’igihugu, mu bushishozi bwe, kuwa Kane ushize, itariki 28 Ukwakira 2021.
Mu minsi ishize Perezida Museveni aherutse gutangaza ko muri kiriya gihugu Hari gushakishwa uburyo ibikorwa byose byagaruka mubuzama busanzwe bwa mbere ya COVID-19.
Mu ijambo yagejeje ku gihugu Perezida Museveni yatangaje ko ibikorwa by’ubukungu bizongera gufungurwa byuzuye muri Mutarama 2022.
Bivuze ko hazaba hashize amezi 22 kuva muri Werurwe 2020 Guverinoma ishyizeho amabwiriza ya guma mu rugo mu rwego rwo gukumira ikwirakwira rya Covid-19.
Uganda yihaye intego y’uko izaba byibuze yakingiye abaturage bayo miliyoni 21 mbere y’uko gahunda zitandukanye zo kurwanya COVID-19 zikurwahobbyuzuye, gusa Perezida Museveni yavuze ko mu kwezi ku Ukuboza 2021 izaba imaze gukingira miliyoni byibuze 12 muri 21.
j
