UEFA Champions league: Liverpool yatsindiye Bayern München mu Budage, FC Barcelona yihaniza Lyon

Amakipe ya FC Barcelona na Liverpool yujuje umubare w’amakipe umunani azakina 1/4 cy’irangiza cya UEFA Champions league, nyuma yo kwitwara neza mu mikino yo kwishyura ya 1/8 cy’irangiza yakinnye mu ijoro ryakeye.

Liverpool yari yasuye Bayern München iyitsindira mu Budage ibitego 3-1, mu gihe FC Barcelona yatsindiye Olympique Lyonnais i Camp Nou ibitego 5-1.

Igice cya mbere cy’umukino wa Liverpool na Bayern München cyarangiye amakipe yombi anganya 1-1. Ni igice cyaranzwe n’umukino ufunguye ku mpande zombi.

Umunya-Senegal Sadio Mane ni we wafunguriye Liverpool amazamu ku munota wa 26, nyuma yo gucenga myugariro Rafigna cyo kimwe n’umuzamu Manuel  Nuer.

Ikipe ya Bayern yishyuye iki gitego ku munota wa 39 w’umukino, ku mupira Serge Gnabry yahinduye imbere y’izamu hanyuma Joel Matip ashatse gukiza izamu birangira yitsinze igitego.

Liverpool y’umutoza Jurgen Klopp yagarutse mu gice cya kabiri isatira Bayern, gusa iyi kipe yo mu Budage na yo yacishagamo igasatira ariko bitari cyane.

Myugariro Virgil Van Dijk yatsindiye Liverpool igitego cya kabiri kinjiye ku munota wa 69. Hari kuri Koruneri yari itewe na James Milner birangira Van Dijk ukomoka mu Buholandi atsinze igitego n’umutwe.

Liverpool yashimangiye insinzi yayo ku munota wa 84 itsinda igitego cya gatatu cyatsinzwe na Sadio Mane. Hari ku mupira uyu musore wigaragaje cyane muri uyu mukino yari ahawe na Mohamed Salah birangira atsinze igitego n’umutwe.

Umukino ubanza hagati y’amakipe yombi wari warangiye anganya 0-0.

Liverpool yakomezanyije muri 1/4 na FC Barcelona yanyagiye Lyon yo mu Bufaransa ibitego 5-1. Aya makipe na yo yari yanganyije 0-0 mu mukino ubanza wabereye i Lyon. FC Barcelona yatsinze igitego cya mbere ku munota wa 17 ibifashijwemo na Lionel Messi. Uretse iki gitego yatsinze kuri Penaliti, yanatsinze icya gatatu cyabonetse ku munota wa 78.

Igitego cya kabiri cya Barcelona cyatsinzwe na Philippe Coutinho ku munota wa 31, Gerard Pique atsinda icya kane ku wa 81 mbere y’uko Ousmane Dembele winjiye mu kibuga asimbura Coutinho aterekamo igitego cya gatanu ku munota wa 86.

Olympique Lyonnais yabonye impozamarira ku munota wa 58 ibifashijwemo na Lucas Tusart.

Amakipe umunani agomba gukina 1/4 cy’irangiza ni Tottenham, Manchester United, Liverpool, Manchester City, Ajax Amsterdam, FC Porto, Juventus na FC Barcelona.

Umukino wa Barcelona na Lyon warebwe n’abafana 92,346.

Sadio Mane yigaragaje cyane imbere ya Bayern München.
Sadio Mane acenga umuzamu Manuel Nuer mbere gato yo gutsinda igitego cya mbere.

Comments

comments