Ubuyobozi bwa Decent Entertainment burashinja Zizou kubagurisha indirimbo yiganwe
Decent Entertainment isanzwe ifasha Allioni nyiri ndirimbo, ‘Tuza” yafatanyije na Bruce Melodie iherutse kuvugwaho gushishura, Ubuyobozi bwe bwashinje Zizou Alpancino kuba ari wihishe inyuma yuku gushishura ndetse ko yabahemukiye akabagurisha indirimbo yiganywe.
Mu ibaruwa igenewe itangazamakuru Decent Entertainment yashyize hanze, ivuga ko iyi ndirimbo bo bayiguze na Zizou Alpacino uyobora inzu itunganya umuziki ya Monster Record ari naho yakorewe ndetse bakabeshywa ko iyi ndirimbo atari inyibano kugeza isohotse.
Iyi baruwa ifitwe umutwe wo “Gusaba Imbabazi” yasinyweho na Alex Muyoboke ureberera inyungu n’ibikorwa bya Allioni igira iti
“Ubuyobozi bwa Decent Entertainment bunejejwe no gusobanura ibyatubayeho muri iyi minsi, aha turisegura ku bakunzi ba muzika muri rusange ku cyasha twasizwe cyo “kwigana” indirimbo y’abandi. Mu by’ukuri indirimbo Tuza ya Allioni Buzindu na Bruce Melody Decent Entertainment iherutse gushyira hanze twemera ko ifite ikibazo kuko hari iyo bisa gusa twe nka Decent Entertainment ndetse n’abahanzi turabamenyesha ko turengana.
Mu by’ukuri twe twaguze indirimbo muri Monster Records, iyi ndirimbo yari yanditse yewe inyikirizo (Chorus) ifashwe amajwi (voice recorded) mu rwego rwo gufasha umuhanzi kuririmbira mu njyana yayo (ibintu bisanzwe bibaho ku Isi yose).
Mu gihe ibitero byose nitwe twabyiyandikiye. Iyi ndirimbo mbere y’uko ijya hanze Ubuyobozi bwa Decent Entertainment bwegereye ubwa Monster Record tubabaza niba koko iyi ndirimbo itaba ari iyo biganye ahandi nk’uko izari zasohotse mbere y’iyacu zagiye zibivugwaho, aha baradutsembeye batubwira ko ari umwimerere wa Monster Record. Twe rero tutari tunazi iyi ndirimbo cyangwa uwayiririmbye bwa mbere twashyize hanze indirimbo ari nabyo byavuyemo ko nyuma y’amasaha macye twamenye ko habayeho kwigana.”
Bruce Melodie waririmbye muri iyi ndirimbo nawe avuga ko DJ Zizou uyobora Monster Record ari we wabahangitse akagurisha indirimbo yiganimwe. Mukiganiro Celebs Zone cyo kuri Televiziyo y’u Rwanda Melodie yagize ati
“Iyi ndirimbo rero abantu benshi bayivuzeho ibintu byinshi kandi koko byari bikwiriye. Ni indirimbo twafatiye amajwi muri Monster Records, ariko twayiguze. Ubwo twayumvaga bwa mbere njyewe na Allioni yari irimo ijwi rya Irakoze Hope, iriya nyikirizo, hariya nyine wumwira ko hari indi byaba bisa. Twe rero urumva iyo ndirimbo ntayo twari tuzi nta n’ubwo twari twiteguye ko turi busange hari indi. Iyo ndirimbo yaguzwe na Allioni ayigura na Zizou.”
Uyu musore utamenyereweho iyi ndeso yo gushishura yasabye imbabazi abafana be ndetse ko ababajwe n’uko yaguye mu ikosa ryo kuririmba indirimbo y’abandi.
“Ntabwo ari umuco nsanganywe, nta n’ubwo ubunyamwuga bwanjye bunyemerera gukora biriya bintu. Icya mbere nakora ni ugusaba imbabazi abafana banjye, uwumva naramutengushye, nkasaba n’imbabazi nyir’iriya ndirimbo kuko ntabwo ari ibintu nakoze mbigambiriye, ahubwo nabikoze hari undi muntu ubizi ntiyamenyesha ibyo ari kunkoresha, dushiduka ibintu byabaye kuriya.”
Si ubwa mbere iyi nzu ya Monster Record ivuyemo indirimbo ikagarukwaho n’abantu benshi bazinenga ko ziganwe muri harimo indirimbo nka Romeo & Juliet ya Dream Boys ft Riderman, Igikomere ya Tom Close ftBulldog, Thank U ya The Ben na Tom Close n’izindi.
