Sosiyete eshatu ziri mu biganiro byo kwegukana ikipe ya Chelsea

Ikipe ya Chelsea ishobora gushyirwa ku isoko mu gihe gito

Nyuma y’uko umuherwe ukomeye w’Ikipe ya Chelsea Roman Abramovich, amaze igihe ahagaritse kureba imikino y’iyi kipe, amakuru aremeza ko iyi kipe iri mu biganiro na Sosiyete eshatu kugira havemo imwe yabasha kuyegukana.

Iyi kipe yo mu cyiciro cya mbere mu Bwongereza haratangazwa ko ishobora gushyirwa ku isoko kugira ngo haboneke amafaranga yo kwishyura umwenda ibereyemo uy’umuherwe wayo.

Daily Mail dukesha iyi nkuru, yatangaje ko Chelsea yagiranye ibiganiro na sosiyete eshatu ku buryo ishobora kugurishwa kuri miliyari 2.5 z’amapawundi.

Muri izo sosiyete ziri mu biganiro byo kugura iyi kipe harimo iyo muri Amerika n’indi yo muri Aziya mu gihe Jim Ratchliffe, umwe mu bagwizatunga bakomeye mu Bwongereza na we yifuza kuyigura.

Umuyobozi wa Chelsea, Bruce Buck, aherutse gushimangira ko Roman Abramovich agishaka kugumana Chelsea n’ubwo kugeza ubu yahagaritse kureba imikino yayo mu gihe Daily Mail yo ivuga ko muri ibi byumweru bishize, ubuyobozi bwa Chelsea bwagiranye ibiganiro n’izindi sosiyete zishobora kugura ikipe.

Abramovich nta mukino wa Chelsea aheruka kwitabira kuva yangiwe guhabwa Visa yo gukorera mu Bwongereza muri Gicurasi 2018. Uyu mugabo w’imyaka 53 ukomoka mu Burusiya, yahise yishakira ubwenegihugu bwa Israel ajya kuba mu Mujyi wa Tel Aviv.

Abramovich umaze imyaka 16 muri iyi kipe, yakoresheje amapawundi ari hagati ya miliyari imwe na miliyari eshatu mu ikipe ya Chelsea kuva ayigezemo mu 2011, ariko ku nshuro ya mbere, mu ntangiriro z’uyu mwaka w’imikino nta mukinnyi n’umwe waguzwe.

Iyi kipe kuri ubu imurimo umwenda wa miliyoni 75 z’amapawundi kugeza mu mwaka ushize, aho bivugwa ko yabona miliyari 1.25 mu gihe Chelsea yaba igurishijwe.

Doug Harmer uyobora Oakwell Capital ikurikiranira hafi inyungu z’amakipe, yavuze ko sosiyete zo muri Amerika na Aziya zifuza kugura amakipe yo mu Bwongereza nyuma yo gusanga agira inyungu ku rwego rwo hejuru, aho amakipe arimo Tottenham, Liverpool na Burnley aheruka gutangaza ko yungutse cyane.

Kugeza ubu, Chelsea ni iya kane muri Premier League n’amanota 66 mu gihe muri Europa League ifite amahirwe menshi yo kugera muri ½ nyuma yo gutsinda Slavia Prague igitego 1-0 mu mukino ubanza wa ¼ iyisanze iwayo.

Ikipe ya Chelsea ishobora gushyirwa ku isoko mu gihe gito
Roman Ibrahomovic usanzwe ari umuherwe wa Chelsea

Comments

comments