Simba SC yafashe icyemezo cyo kwirukana Didier Gomes da Rosa

Ikipe ya Simba Sports Club yo mu gihugu cya Tanzania, yafashe icyemezo cyo kwirukana Umufaransa Didier Gomes da Rosa nyuma yo kunanirwa kuyigeza mu matsinda ya CAF Champions league.

Didier Gomes w’imyaka 52 y’amavuko, yari umutoza wa Simba kuva muri Mutarama uyu mwaka asimbuye Umubiligi Patrick Aussems werekeje muri RS Berkane yo muri Maroc.

Uyu mutoza watoje Rayon Sports hagati ya 2012 na 2013, yageze muri Simba akubutse muri Al-Merrikh yo muri Sudani.

Amakuru aturuka muri Tanzania avuga ko ubuyobozi bwa Simba bwafashe icyemezo cyo kumwirukana, nyuma yo gutungurwa na Jwaneng Galaxy yo muri Botswana ikabasezerera muri CAF Champions league.

Mu mukino ubanza Simba yari yarashoboye gutsindira iyi kipe ibitego 2-0 muri Botswana, gusa mu wo kwishyura itungurwa no gutsindirwa ibitego 3-1 imbere y’abafana bayo.

Umutoza Didier Gomes da Rosa ntiyatoje iyi mikino yombi kuko License A ya UEFA afite itamwemerera gutoza imikino ya CAF Champions league.

Mu gihe uyu mutoza yaba yirukanwe bisobanuye ko Simba ishobora gusigara itozwa n’Umunyarwanda Thierry Hitimana wari umwungirije.

Simba nyuma yo gusezererwa na Jwaneng Galaxy yahise ikomereza muri CAF Confederation Cup, aho itegereje kumenya ikipe bazahura kuri uyu wa Kabiri.