Yvan Buravan yerekeje i Burayi
Mu gitondo cyo kuri uyu wa Kabiri tariki ya 10 Nyakanga 2018, umuhanzi Yvan Buravan uherutse gukorana indirimbo na Se, yerekeje i mu Bubiligi aho agiye gukorera igitaramo azahuriramo n’itorero urukerereza, ni ubwa mbere agiye gukorera igitaramo hanze y’igihugu.
Iki gitaramo agiyemo kizabera i Bruxelles cyateguwe na Minisiteri y’umuco na Siporo ku bufatanye na Minisiteri y’ububanyi n’amahanga ndetse na Ambasade y’u Rwanda mu Bubiligi.
Buravan ajya guhaguruka yatubwiye ko agiye kwerekana ubuhanga afite nubwo ari ubwa mbere agiye gutaramira i Bruxelles.
Ati “Bangiriye ikizere barantumira nanjye rero ayo mahirwe ngomba kuyabyaza umusaruro nkabereka ubuhanga bwanjye kugirango n’ ikindi gihe bajye bankenera”.
Muri iki gitaramo, Yvan Buravan yahawe ubutumire n’itorero Urukerereza kugirango azafatanye nabo gususurutsa abanyarwanda baba mu Bubiligi n’abandi baba iburayi bakaba babasha kugera i Bruxelles.
Biteganyijwe ko nta gihindutse iki gitaramo cyana tariki ya 13 Nyakanga 2018 kikabera i Birmingham Palace, 112-B muri Komine ya Anderlecht iherereye mu Murwa Mukuru w’u Bubiligi, Bruxelles.
