World Cup: Croatia yatsinze Abongereza isanga Abafaransa ku mukino wa nyuma
Ikipe y’igihugu ya Croatia yaraye ikatishije tike y’umukino wa nyuma w’igikombe cy’isi kiri kugana ku musozo, nyuma yo gutsinda Abongereza ibitego 2-1 mu mukino wa 1/2 cy’irangiza wiyambajwemo iminota 30 y’inyongera.
Ibitego bya Ivan Persic na Mario Mandzukic ni byo byaraye bifashije ikipe ya Croatia kwandika amateka yo kugera ku mukino wa nyuma w’igikombe cy’isi ku ncuro ya mbere.
Ni umukino wari ufunguye ku mpande zombi, dore ko amakipe yombi yagaragazaga inyota yo gutsinda ibitego. Abasore barimo Raheem Sterling na Kieran Trippier ni bamwe cyane mu bigaragaje ku ruhande rw’ikipe y’umutoza Gareth Southgate, mu gihe Ivan Persic, Luka Modric na Ivan Persic bari mu bigaragaje cyae ku ruhande rwa Croatia.
Abongereza bafunguye amazamu hakiri kare cyane, ku munota wa 5 babifashijwe na Coup Franc yari itewe na Kieran Trippier.
Iyi kipe yashoboraga kubona ikindi gitego ku munota wa 30 nyuma y’uko Harry Kane yari asigaranye n’umuzamu Daniele Subasic, gusa umupira uyu muzamu wa AS Monaco akuramo umupira.
Igice cya mbere cyarangiye Abongereza bari imbere na 1-0.
Ikipe ya Croatia yagarukanye imbaraga zidasanzwe mu gice cya kabiri cy’umukino, abasore barimo Luka Modric, Ivan Persic, Ivan Raktic, Rebic na Mario Mandzukic bakora ibishoboka byose ngo bishyure, gusa ba myugariro b’Ubwongereza n’umuzamu Jordan Pickford bagatabara izamu ryabo.
Crotatia yabonye igitego cyo kwishyura ku munota wa 68 ifashijwe na Ivan Perisic wigaragaje cyane, ku mupira wari ukaswe na Šime Vrsaljko birangira Perisic awukuye ku mutwe wa Kyle Walker.
Iminota isanzwe y’umukino yarangiye amakipe yombi anganya 1-1, biba ngombwa ko hiyambazwa iminota 30 y’inyongera.
Amakipe yombi yagerageje gukina ashaka igitego cya kabiri mu gace ka mbere k’umukino, gusa nta kipe yigeze ibona igitego cya kabiri. Croatia ni yo yabonye uburyo bw’igitego muri aka gace, ku mupira Mario Mandzukic yateye ku munota wa 98 ugashyirwa muri Koruneri na Jordan Pickford.
Ibintu byaje kuba byiza ku ruhande rwa Croatia ubwo Mario Mandzukic yatsindaga igitego cya kabiri ku munota wa 109, ku mupira Ivan Perisic yamuhaye n’umutwe bikarangira acitse ab’inuma b’Ubwongereza.
Iyi kipe igomba gucakirana n’Abafaransa ku mukino wa nyuma uteganyijwe kuri iki cyumweru saa mbiri z’ijoro.
