USA: New York honyine harabarurwa umubare munini w’abanduye coronavirus mwinshi kurusha ahandi hose ku isi

Imibare y’abamaze kwandura coronavirus yo kuri uyu wa gatanu tariki ya 10 Mata igaragaza ko leta ya New York imwe muzigize leta z’unze ubumwe za Amerika ubu ifite umubare mwinshi w’abanduye kurusha ibindi bihugu byose by’isi.

Inkuru ya BBC, ivuga ko uretse Amerika yo ubwayo iyi leta iherereyemo, nta kindi gihugu ku isi gisumbya New York umubare w’abanduye kuku ubu bamaze kugera ku 159 937.

Imibare yo kuri uyu wa kane yagaragazaga ko ibindi bihugu bifite umubare munini nka Espanye yari ifite abarwayi 153 000, Ubutaliyani bufite abanduye 143 000.

Mugihe mu Bushinwa aho iyi ndwara yahereye habarurwaga abagera ku 82 000.

Nubwo ariko New York ivugwamo kugira umubare munini w’abanduye, iza ku mwanya wa gatatu mu kugira umubare w’abamaze guhitanwa na covid-19, kuko iza inyuma y’Ubutaliyani bgejeje imfu 18 000 na Esipanye ifite 15 500 na ho yo ikagira 7000.

Kugeza ubu muri Leta zunze ubumwe za Amerika hose harabarurwa abanduye bagera ku 462 000 muri bo abagera ku 16 500 bakaba bamaze guhitanwa n’iki cyorezo.

Mu kiganiro Dr Anthony Fausi umwe mu bayobozi b’itsinda ryashyiriweho guhangana na Covid-19 yagiranye na NBC yavuze ko imibare yerekana ko abahitanwa na coronavirus bashobora kuzashyika ku bihumbi 60 aho muri Amerika.

Ni mu gihe amakuru ava mu biro bya perezida yerekana ko niba ntagikozwe ngo iki cyorezo gihagarare, abagera kuri miliyoni 2.2 bashobora kuzahitanwa na cyo.

Kugeza ubu ku isi yose harabarurwa abasaga miliyoni 1.6 y’abamaze kwandura iyi virus yo mu bwoko bwa corona mugihe abakabakaba hafi ibihumbi 100 imaze kubahitana kuko basaga ibihumbi 95.

Aho muri Leta Zunze ubumwe za Amerika abahitanwe n’iki cyorezo barashyngurwa mu mva rusange ku kirwa cya Hart island!