USA mu kaga: Abarenga 2000 bishwe na Coronavirus umunsi umwe

eta Zunze Ubumwe z’Amerika zabaye igihugu cya mbere ku isi gipfushije abarwayi barenga 2,000 ba Covid-19, indwara yo mu buhumekero iterwa n’ubwoko bushya bwa coronavirus mu munsi umwe.

Imibare ya Kaminuza ya Johns Hopkins igaragaza ko abantu 2,108 bishwe na coronavirus mu masaha 24 ashize, mu gihe ubu abarenga 500,000 bamaze kwemezwa ko bayanduye muri Amerika.

Hafi kimwe cya kabiri cy’abo bapfuye ku munsi w’ejo ku wa gatanu ni abo mu gace ka New York.

Bose hamwe, abarenga 18,700 imaze kubica naho abarenga 29,000 bamaze kuyikira muri Amerika, nkuko iyo mibare ibigaragaza.

Vuba aha Amerika ishobora guca ku Butaliyani aho imaze kwica abantu 18,849 mu kugira umubare munini wa mbere ku isi w’abamaze kwicwa na coronavirus.

Impuguke zo mu itsinda ryo kurwanya Covid-19 ryo mu biro bya perezida w’Amerika bya White House, zivuga ko iki cyorezo gitangiye kugenza macye muri Amerika hose.

Dr Deborah Birx, umwe mu bagize iryo tsinda, yavuze ko hari ibimenyetso byiza byuko iki cyorezo kiri guhama hamwe, ariko aburira agira ati:”Uko bitanga icyizere kose, ntabwo turagera ku kigero cyo hejuru [twiteze kugeraho muri iki cyorezo]”.

Perezida Donald Trump na we yavuze ko yiteze kubona umubare w’abicwa na coronavirus ugabanuka ukaba munsi y’impfu 100,000 zateganywaga ku ikubitiro.

Abashakashatsi bateganyaga ko umubare w’abicwa na coronavirus muri Amerika uzagera ku kigero cyawo cyo hejuru cyane ejo ku wa gatanu, hanyuma buhoro buhoro ugatangira kugenda ugabanuka.

Abo bashakashatsi bateganya ko ku itariki ya mbere y’ukwa gatanu wagabanuka ukagera ku bantu barenga 970 bapfa ku munsi.

Uwo munsi w’itariki ya mbere y’ukwa gatanu ni na wo abo mu butegetsi bwa Bwana Trump batanzeho igitekerezo ko ari ho urwego rw’ubukungu rushobora gutangira kongera gukora.

Kugeza kuri uyu wa gatandatu, abarenga 1,600,000 bamaze kwemezwa ko banduye coronavirus ku isi, abarenga 100,000 imaze kubica naho abarenga 370,000 bamaze kuyikira.

BBC