Urukundo ruri gutuma Platini wo mu itsinda rya Dream Boys ahera mucyeragati

Mu ntangiro za Mutarama 2017 nibwo hamenyekanye inkuru y’uko Platini wo mu itsinda rya Dreamz Boys yatandukanye burundu  na Ingabire Diane bari bamaze imyaka ine bakundana  banitegura kurushinga, nyuma y’amezi umunani batandukanye uyu musore yahise avuga ibye agiye kujya abitawara bucece. Ariko Bzzyamwanze mu nda agira icyo avuga ku rukundo.

Abonyujije ku nkuta ze zitandukanye nkoranyambaga, Platini yanditse yibaza niba urukundo rukibaho, yari ameze nk’uri mu ihurizo rikomeye ry’urukundo ndetse bigaragara ko ashengurwa n’urukundo abona  hanze aha. Gusa ntiyigeze abwira abakunzi be ndetse n’abandi bamukurikira impamvu y’ubu butumwa.

Yagize ati”Abantu benshi bababajwe n’urukundo. Abasore, inkumi, abagabo n’abagore benshi barazinutswe, Hari abakubise hirya hino biranga wa mugani ngo ntibucya kabiri hatajemo amahiri . Ese koko rukundo nyakuri rudashingiye kuburyarya cyangwa  izindi ndonke RURACYARIHO?  Hari Abantu bakundana se by’ukuri? Nsangiza igitegerezo cyawe ,mpamvu y’iki kibazo ndayisobanura nyuma , Ese rukundo nyakuri koko RURACYARIHO? Wowe ubibona ute?”

Nyuma y’ubu butumwa Patini yatangarije umunyamakuru wa Inyarwanda ko  ntaho buhuriye n’ubuzima bwe bwite ahubwo yagendeye ku bitekererzo ndetse n’ibyo abona muri iyi minsi.  Abajijwe ku by’urukundo rwe na Diane avuga ko atagishaka kuruvugaho kuko ubuzima bwahindutse bikaba bitakiri ngombwa ko yaba akibitindaho.

Ati”Njye niganiriraga n’abakunzi banjye bo ku mbuga zanjye usibye ko dufite n’indirimbo ifite aho ihuriye nabyo twenda gushyira hanze. Ibya ruriya rukundo sinshaka kubivugaho ubuzima bwarahindutse buri wese afite uko abayeho.”

Platini yakundanye na Ingabire Diane guhera muri 2013 gusa bakagenda babyitarutsa, muri 2014 nibwo bombi batangiye kubigaragaza ndetse batangira gushyira amafoto yabo ku mbuga nkoranyambaga bari kumwe bigaragara ko bari mu buryohe bw’urukundo.

Muri mutarama 2017 urukundo rwabo rwabaye amateka, Diane ahita atangaza umukunzi mushya yari afite witwa Rutayisire Feston, icyo gihe Platini yumvikanye mu itangazamakuru  avuga ko atazongera gutangaza umukunzi we ahubwo azajya abitwara bucece nka mugenzi we TMC baririmbana utajya agaragara avugwaho inkuru n’imwe ijyanye n’urukundo.