Umwe mu bakinnyi bakomeye ba Arsenal azitabira umuhango wo kwita izina
Ubuyobozi bw’ikigo cy’igihugu cy’iterambere RDB bwatangaje y’uko umwe mu bakinnyi bakomeye b’ikipe ya Arsenal iherutse kugirana amasezerano yo kwamamariza u Rwanda azaza mu Rwanda, mu muhango wo kwita izina abana b’ingagi uteganyijwe muri Nzeri uyu mwaka.
Iki gikorwa cyo kwita izina ku ncuro ya 14 kizaba ku wa 07 Nzeri 2018, mu Kinigi ho mu karere ka Musanze aho gisanzwe kibera.
Hazahabwa amazina abana b’ingagi 23 bavutse aho hazanagarukwa ku gikorwa cyo kubungabunga urusobe rw’ibinyabuzima.
Belise Kariza ushinzwe ishami ry’ubukerarugendo muri RDB avuga ko umubare w’ingagi zo muri Pariki y’Ibirunga wazamutse ukagera kuri 604 uvuye kuri 408 muri 2010.
Ati “Uyu musaruro mwiza watweretse ko imbaraga twashyize mu kubungabunga urusobe rw’ibinyabuzima zagize akamaro.”
Yanavuze y’uko igikorwa cyo kwita izina cy’uyu mwaka kizagaragaramo ibishya byinshi, gusa ngo igikomeye muri byo ni uko umwe mu bakinnyi ba Arsenal azaba ari mu banyacyubahiro bazaba bateraniye mu Kinigi ubwo uyu muhango uzaba uri kuba.
Yirinze kuvuga uyu mukinnyi ngo kuko ari agaseke kagipfundikiye, kazafungurwa muri uriya muhango uhuriza hamwe abatari bake barimo abasanzwe bakunda ubukerarugendo.
Imibare ya RDB igaragaza ko kuva mu 2005 hamaze kwitwa abana b’ingagi bagera kuri 239. Umuhango wo kwita izina waherukaga mu mwaka ushize ukaba wari witabiriwe n’ibyamamare bitandukanye, harimo Mugisha Benjamin(The Ben) umwe mu banyamuziki bakunzwe cyane hano mu Rwanda, ndetse na Veronica Varekov, umunyamideli wo muri Czech Republic.
