Umwanya u Rwanda ruriho ku rutonde rwa FIFA
Urutonde Ngarukakwezi rushyirwa hanze n’Ishyirahamwe ry’Umupira w’Amaguru ku Isi, FIFA rukagaragaza uko amakipe y’ibihugu ahagaze, u Rwanda ruri ku mwanya w’i 133.
Ni urutonde rwasohotse kuri uyu wa Kane, tariki ya 25 Nyakanga, rwasize impinduka zikomeye ku makipe yegukanye ibikombe ku migabane yayo mu gihe u Rwanda rutagiye mu marushanwa ayariyo yose ndetse ntirunakine imikino ya gishuti rwisanze ku mwanya wa 133.
Ikipe y’Igihugu Amavubi imaze amezi ane idakina umukino mpuzamahanga, yazamutse imyanya itatu ku rutonde rwa FIFA, aho yabaye iya 133 ku Isi n’uwa 36 muri Afurika.
Mu karere, Tanzania iheruka mu gikombe cya Afurika cyabereye mu Misiri, yo yamanutse imyanya itandatu iba iya 137. Ikipe y’u Burundi na yo yavuye mu Gikombe cya Afurika nta mukino itsinze nta n’igitego yinjije, yisanze ku mwanya wa 148 nyuma yo gusubira inyuma imyanya 14 yose.
Uganda yagarukiye muri 1/8 muri iri rushanwa riheruka kubera mu Misiri, yagumye ku mwanya wa 80 mu gihe Repubulika Iharanira Demokarasi ya Congo na yo yasezerewe itarenze 1/8 yaje ku mwanya wa 56 nyuma yo gutakaza imyanya irindwi.
Ikipe y’Igihugu ya Brésil [Samba Boys] yegukanye Copa América yazamutseho umwanya umwe iba iya kabiri ku Isi, aho yatambutse ku Bufaransa bwabaye ubwa gatatu nyuma yo gutakaza umwanya umwe.
Mexique yatwaye Gold Cup muri CONCACAF, yazamutseho imyanya itandatu iba iya 12 ku Isi mu gihe Leta zunze Ubumwe za Amerika bahuriye ku mukino wa nyuma yazamutseho imyanya umunani iba iya 22.
Algérie yegukanye Igikombe cya Afurika, yazamutse imyaka 28 iba iya 40 mu gihe Sénégal yatsindiwe ku mukino wa nyuma, yo yazamutse imyanya ibiri ikaba iya 20.
Ibihugu 10 bya mbere ku Isi ni U Bubiligi, Brésil, u Bufaransa, u Bwongereza, Uruguay, Portugal, Croatie, Colombie, Espagne na Argentine, mu gihe muri Afurika ari Sénégal , Tunisie , Nigeria , Algérie, Maroc , Misiri , Ghana , Cameroun, DRC na Côte d’Ivoire.
