Umutoza w’ Ikipe ikomeye mu Rwanda yitabye Imana
Kuri uyu wa Gatanu tariki ya 16 Kamena 2023 umupira w’ amaguru w’ u Rwanda uri mu kababaro ko kubura umutoza uri mu batoza bakomeye Nduhirabandi Abdul Kharim uzwi ku izina rya Coka, watoje amakipe atandukanye mu Rwanda nka Marines FC, Kirehe FC na Etincelles FC.
Coka yitabye Imana azize uburwayi ndetse yari amaze igihe kirekire arwariye mu Bitaro byitiriwe Umwami Faisal mbere yo koherezwa muri Kenya nyuma yaje gusezererwa ajya kuvurirwa mu Bitaro by’i Gisenyi aho yakurikiranirwaga mbere y’uko yitaba Imana.
Amakuru y’ urupfu rwe yatangajwe n’urukuta rwa Twitter rw’ Ikipe ya Marine FC yihanganisha umuryango we. Ubwo butumwa bwagira buti: “Tubabajwe no kubamenyesha urupfu rw’uwahoze ari umutoza wacu NDUHIRABANDI ABDUL KHARIM (COKA). Imana imwakire mu bayo n’abasigaye ibahe gukomera!” Maze igasoza ivuga ngo Uruhukire mu Mahoro Icyamamare.
Coka yatoje Marines FC imyaka 20 mbere yo gutandukana na yo mu 2017. Uretse gutoza, Nduhirabandi yakiniye amakipe atandukanye mu Rwanda arimo Kiyovu Sports, Etincelles FC na Marines FC yanyuzemo mbere yo guhabwa inshingano zo kuyitoza.
