Umutoza Nduhirabandi uheruka gutsindwa na Marines yahagaritswe na Etincelles FC
Ubuyobozi bw’ikipe ya Etincelles FC, bwamaze guhagarika igihe kitazwi Nduhirabandi Abdoulkarim Choka usanzwe ari umutoza mukuru w’iriya kipe nyuma y’iminsi mike atsinzwe na Marines FC muri derby ya Rubavu.
Amakuru avuga ko uyu mutoza yahagaritswe na Etincelles FC azira kugumura abakinnyi b’ikipe ye ari na byo byabaye intandaro yo gutsindwa na Marines.
Etincelles FC yahagaritse umutoza mukuru wayo, mu gihe ku munsi w’ejo ku wa gatandatu ifitanye na Marines FC umukino wo kwishyuwa wa 1/16 cy’igikombe cy’amahoro. Ni umukino uzabera kuri Stade Umuganda i Rubavu.
Umukino ubanza wari wahuje aya makipe yombi ku wa gatatu w’iki cyumweru warangiye ikipe ya Marines itsinze Etincelles FC ibitego 2-0. Ibitego bya Ishimwe Fiston na Ndayisenga Ramadhan ni byo byafashije Marines FC y’umutoza Rwasamanzi Yves kwihimura kuri Etincelles yaherukaga kuyitsinda kabiri kikurikiranya muri shampiyona.
