Umutoza mukuru wa KIYOVU Sports yamanitse amaboko
Umugereki Petros Koukouras watoza Kiyovu Sports, yananiwe kwihanganira ibibazo by’amikoro ifite, ahitamo gutandukana na yo nyuma yo kumara amezi abiri adahembwa.
Koukouras yagizwe Umutoza wa Kiyovu Sports muri Kamena uyu mwaka ndetse kugeza ubu yari amaze kuyitoza imikino 10 ya Shampiyona aho iri ku mwanya wa gatanu n’amanota 15, irushwa amanota umunani na Musanze FC ya mbere.
Ubwo Urucaca rwasubukuraga imyitozo ku wa Mbere, yitabiriwe n’abakinnyi batageze ku 10, uyu mutoza ntiyitabiriye kuko yamaze gufata icyemezo cyo kudakomezanya n’iyi kipe yambara icyatsi n’umweru.
Umwe mu bayobozi ba Kiyovu Sports yabwiye IGIHE dukesha iyi nkuru ko bisa n’ibyarangiye, bagomba gutandukana na Petros Koukouras ndetse batangiye gushaka umutoza uzamusimbura.
Byitezwe ko kuri uyu wa Kabiri ari bwo uyu mutoza w’Umugereki yicarana na Kiyovu Sports, impande zombi zikumvikana uko zitandukana mu mahoro.
Kiyovu Sports ntirishyura amezi abiri aheruka Koukouras bivugwa ko ahembwa 3000$ ku kwezi.
Nyuma y’imikino mpuzamahanga, Shampiyona izasubukurwa Kiyovu Sports yakira APR FC ku wa 25 Ugushyingo 2023.
Ku rundi ruhande,Kiyovu Sports yateguye inama y’inteko rusange idasanzwe,kuwa 19 Ugushyingo,mu rwego rwo kwigira hamwe ibibazo biri mu muryango wa KIYOVU Sports.
