Umuramyi Don Moen yageze i Kigali-AMAFOTO

Umunyabigwi mu ndirimbo zo kuramya no guhimbaza Imana , Don Moen, yageze i Kigali kuhakorera igitaramo cyiswe ‘MTN Kigali Praise Fest’ giteganyijwe kuba kuri uyu wa Gatandatu tariki 10 Gashyantare 2019 ahahoze hitwa Camp Kigali.

Don Moen w’imyaka 68 nyuma yo kugera ku kibuga cy’indege i Kanombe  yahise yerekeza kuri Park Inn Hotel  ari naho aza gukorera ikiganiro n’itangazamakuru.

Akigera i Kigali yabwiye itangazamakuru ko Abanyarwanda batuye hina no hino ku Isi bamushishikarizaga kuza mu Rwanda, ngo arabizi neza ko Abanyarwanda bakunda indirimbo ze bityo ko yishimiye kuba ahageze ku nshuro ye ya mbere.

Don Moen wamamaye mu ndirimbo nka  God Will Make a Way, Thank you Lord, How great is our God, God is Good, Here We Are, Arise, I Will Sing, nizindi nyinshi zakunzwe n’abatari bake ku Isi, yakuriye muri Minnesota muri Amerika , yiga muri  Oral Roberts University muri  Oklahoma, ari naho impano ye yo kuririmba yazamukiye.

Kwinjira muri iki gitaramo cyiswe ‘MTN Kigali Praise Fest 2019’ ni  11,400 Rwf (ahasanzwe),  23,750Rwf (muri VIP) naho mu myanya y’icyubahiro cy’ikirenga ku bantu umunani bazihuriza ku meza imwe ni  237,500 Rwf.

Muri iki gitaramo,  ibitangazamakuru byifuza kuzakurikirana iki gitaramo nta cyemerewe gufata amashusho mu buryo bwo kuyatangaza, abifuza amafoto bazifashisha inkuru zivuga kuri iki gitaramo ikindi kandi nta muntu uzemererwa kwinjirana camera .

Nta gitangazamakuru cyemerewe gukorana na we ikiganiro ku buryo bw’umwihariko , iki gitaramo kizaba kirimo umuhanzi w’umunyarwanda Israel Mbonyi ukunzwe n’abakirisitu benshi.

Don ageze mu Rwanda avuye i Kampala kuhakorera igitaramo cyiswe  ‘Kampala Festival Praise Fest Edition’ yafatanyijemo n’abahanzi barimo Levixone, Pr. Wilson Bugembe, Watoto Children’s choir, Brian Lubega, Sandra Suubi, Exodus n’abandi.

RG-Consult ni yo yateguye ibi bitaramo byombi Don Moen agiye gukorera muri Afurika y’iburasirazuba.