Umunyarwandakazi wabaye Miss w’ Ubufaransa yagarutse mu Rwanda
Umunyarwandakazi wabaye Miss w’ Ubufaransa mu mwaka wa 2000, Uwitonze Sonia Rolland yagarutse mu Rwanda nyuma y’igihe kitageze no ku kwezi ahavuye.
Ku ya 24 Gashyantare nibwo Sonia Rolland yari mu Rwanda, icyo gihe yari yaje kwitabira ibirori byo kwimika Nyampinga w’ u Rwanda wa 2018 byabereye muri Kigali Convention Center ndetse yarari no mu bagize akanama nkemurampaka bari barangajwe imbere n’umunyamamakuru Sandrine Isheja.
Mu gitondo cyo kuri uyu wa Gatandatu nibwo Miss w’ Ubufaransa Uwitonze Sonia Rolland yageze ku kibuga cy’indege i Kanombe, icyo yaje gukora ntabwo cyari cyamenyekana ariko ntakabuze U Rwanda n’igihugu cyamubyaye kandi akunda akaba ari nayo mpamvu akunda kuhagaruka nkuko adahwema kubitangaza.
Uwitonze yavuye mu Rwanda afite imyaka 10, yumva neza ururimi rw’ikinyarwanda ndetse agerageza kuruvuga n’ubwo hari aho agera agategwa , uyu Nyampinga w’ Ubufaransa wa 2000 rero amaze no kugira abana babiri.
Uwitonze kandi ashishikajwe n’iterambere ry’abagore bo muri Afurika dore ko ku wa 08 Werurwe Sonia Rolland yari yerekanye bwa mbere kuri televiziyo ya Planete+ filime mbarankuru ivuga ku iterambere ry’abagore bo mu Rwanda. Yagiye kandi akora filime zitandukanye zivuga ku gihugu cy’u Rwanda, igihugu avuga ko akunda cyane.
