Umunyafurika Ansu Fati akomeje guca uduhigo muri FC Barcelona

Ku myaka 16 y’amavuko yonyine, Umunya-Guinee Bissau Ansu Fati akomeje kwandika amateka mu kipe y’igihangage ya FC Barcelona asanzwe akinira.

Nta gihe kinini gishize uyu musore ukiri muto amenyekanye, dore ko FC Barcelona amaze kuyikinira imikino itatu yonyine.

Uwa mbere awukina yahise aca agahigo ko kuba umukinnyi ukiri muto mu mateka y’iyi kipe wari ubashije gukina umukino muri shampiyona ya Espagne, mbere yo kuyifasha kubona inota rimwe mu mukino w’umunsi wa gatatu wa shampiyona ya Espagne iyi kipe yanganyijemo na Osasuna ibitego 2-2.

Ansu Fati yongeye gutuma abakunzi ba ruhago ku isi bacika ururondogoro, yongera gufasha FC Barcelona kunyagira Valencia ibitego 5-2, mu mukino w’umunsi wa kane wa shampiyona ya Espagne.

Uyu musore ukiri muto ni we wafunguriye iyi kipe amazamu, ku gitego yatsinze ku munota wa kabiri w’umukino.

Ni mbere y’uko Frenke de Jong atsinda igitego cya kabiri ku munota wa karindwi, Luis Suarez yongeramo ibindi bibiri, mu gihe Gerard Pique yari yatsindiye FC Barcelona igitego cya kane.

Ibitego bibiri by’impozamarira ku ruhande rwa Valencia byatsinzwe na Kevin Gameiro cyo kimwe na Maximiliano Gomez Gonzalez.

Ansu Fati kandi yaciye agahigo ko kuba umukinnyi ukiri muto mu mateka ya FC Barcelona wabashije kugirirwa ikizere cyo kubanza mu kibuga iyi kipe ikinira i Camp Nou.

Yaciye agahigo kandi ko kuba umukinnyi ufite imyaka nk’iye ubashize gutsinda igitego akanatanga uupira w’igitego muri shampiyona ya Espagne.