Umunya-Tanzaniakazi ukina amafilimi yatangaje ko yiteguye kuroga Diamond bakabyarana

Lulu Semagongo, umugore ukina amafilimi wo mu gihugu cya Tanzania yatangaje kumugaragaro ko yiteguye kuroga umuhanzi Diamond Platnumz bakabyarana umwana.

Uyu mugore uzwi cyane nka  Aunty Lulu yatunguye abantu ubwo yatangazaga ku mugaragaro ko yarose kenshi kuba umukunzi wa Diamond ndetse no kubyarana na we, intego yifuza kuzapfa agezeho.

Aganira n’ikinyamakuru MotoMoto News cyo mu gihugu cya Tanzania, Lulu yavuze ko azajya gushaka umupfumu akamurogera Diamond kugira ngo uyu muhanzi amutere inda akomeje kwifuza.

Uyu mugore avuga ko azasaba umupfumu gutuma Diamond yibagirwa gukoresha agakingirizo ubwo bazaba baryamanye mu rwego rwo kugira ngo abashe gusama.

Ati”Diamond yavuze ko ari menge muri iyi minsi ku buryo adashobora kubyara abana hanze, gusa nzamuroga ku buryo azemera kumbyarira umwana. Nabirose kenshi kugeza magingo aya. Nta kizampagarika kuko nizera umupfumu wanjye.”

Inkuru y’uyu mugore imenyekanye nyuma y’umunsi umwe Diamond atangaje ko Hamisa Mobeto babyaranye umwana ari kugerageza kumuroga.

Diamond arakaye cyane, yavuze ko Hamisa Mobeto adashobora gutuma amukunda cyane yifashishije amarazi.

Amakuru y’uko Hamisa ashobora kuba yararoze Diamond cyangwa ari kugerageza kumuroga, yasakaye nyuma y’amajwi yumvikanye uyu mugore aganira n’undi mugabo kuri terefoni bikekwa ko ari umupfumu we.

Muri aya majwi, harimo irivugwa ko ari irya Hamisa Mobeto risaba umupfumu gutuma Diamond amukunda akanamwubakira inzu.

Cyakoze Hamisa n’inshuti ze za hafi banyomoje aya makuru bavuga ko nta mupfumu n’umwe bigeze bagirana ibiganiro.