Umukinnyi wo muri NBA yasanzwemo coronavirus imikino iba ihagaritswe

Amakuru ataremezwa n’ababishinzwe avuga ko umukinnyi w’Umufaransa Rudy Gobert ukina muri NBA, ariwe wasanze yaranduye icyorezo cya coronavirus kimaze guteza ingaruka nyinshi mu mikino itandukanye ku Isi.

Uyu mukinnyi usanzwe akinira ikipe ya Basketball ya Utah Jazz bivugwa ko basanze afite iyi virus, bikaba byatumye kuri uyu wa kane batangaza ko imikino yose ya NBA ibaye ihagaritswe mu gihe runaka.

NBA yatangaje ko imikino yose yari iteganyijwe isubitswe kuva kuwa gatatu nijoro (kuwa kane mu gitondo muri aka karere) kugeza ku rindi tangazo.

Ikipe ya Utah Juzz yatan gaje amakuru y’uko uyu mukinnyi wayo yasanzwemo coronavirus n’ubwo bitaremezwa ku mugaragaro n’inzego zishinzwe ubuzima.

Ibi byatangajwe mbere gato y’umukino wari ugiye guhuza Jazz na Oklahoma City Thunder ugahita usubikwa muri iri joro ryo kuwa gatatu muri Amerika.

NBA yatangaje ko umukinnyi basanganye iyi ndwara atari yaje kuri uyu mukino.

Abakinnyi babiri ba Jazz Rudy Gobert na Emmanuel Muddiay ntibari mu bagombaga gukina uyu mukino cyangwa ku kibuga.

Nyiri ikipe ya Dallas Mavericks, Mark Cuban, yumvise ibyatangajwe na NBA mu ijoro ryakeye yagize ati:”Natekereje ko ari nko gushyenga. Ndumva atari ukuri. Wagira ngo ni filimi”.

Undi mukino wari ugiye guhuza Sakramento Kings na New Orleans Pelicans mu ijoro ryakeye nawo wahise usubikwa.