Umuhanzi w’umufaransa Slai utegerejwe muri Kigali Jazz Junction araye i Kigali

Slai, umuhanzi wo mu bufaransa watumiwe mu gitaramo kiri mu bimaze gushinga imizi i Kigali ‘ Kigali Jazz Junction’ yageze i Kigali akumbuza abantu iki gitaramo yatumiwemo.

Saa mbiri n’igice zo kuri uyu wa Kabiri tariki 19 Gashyantare  ni bwo Slai yageze ku kibuga cy’indege mpuzamahanga cya Kigali ahabwa indabo n’abari baturutse muri kompanyi ya  RG-Consult inc ari nayo yateguye iki gitaramo.

Yabwiye itangazamakuru ko yishimiye kugera i Kigali ndetse ko yiteguye gushimisha abazaba bitabiriye iki gitaramo, yanavuze ko atari ubwa mbere ahageze kuko ahaheruka mu myaka 8 ishize.

Yagize ati:”Niteguye kuririmbira abanyarwanda n’abandi indirimbo zanjye. Bazaze twishimiye mu ndirimbo z’urukundo, nzaririmba “Flamme” yakunzwe cyane n’izindi nyinshi. Ndizera abanyarwanda n’abandi bazishimira igitaramo cy’umwimerere.”

Iki gitaramo kizaba ku wa 22 Gashyantare 2019, muri Kigali Conference and Exhibition Village hazwi nka Camp Kigali. Kwinjira bizaba ari 10 000 Frw mu myanya isanzwe, 20 000 Frw mu y’icyubahiro ndetse na 240 000 Frw ku meza y’abantu umunani.

Patrice Sylvestre wamamaye nka Slai, yavukiye mu gace ka Val-d’Oise mu Majyaruguru y’u Bufaransa, ni umuririmbyi w’Umufaransa ufite inkomoko muri Guadeloupe.

Mu 1998 yashyize hanze indirimbo yise ‘Flamme’ imumenyekanisha mu buryo bukomeye mu gace akomokamo ndetse aba umwe mu bahanzi bihariye igikundiro muri Caraïbe.

Mu 2000, Slaï yatwaye ibihembo bikomeye muri Tropical Music Awards. Icya mbere cyari icy’indirimbo yagurishijwe cyane abikesheje ‘Flamme’, icya kabiri ari icy’umuntu wigaragaje cyane muri uwo mwaka.

Umva hano indirimbo ye yise ‘Flamme’