Umuhanzi ‘Riderman yahishuye icyatumye areka ishuri

Umuhanzi benshi bakunze kwita umwami wa Hip Hop mu Rwanda Gatsinzi Emery uzwi nka Riderman  yavuze ko ubwo yigaga muri Kaminuza yigenga ya Kigali ULK, aho yigaga mu mu bijyanye n’ubukerarugendo ndetse no kumenyekanisha ibikorwa, yaje guhagarika amasomo ye atayasoje kugirango yite ku bijyanye n’umuziki we.

Ibi Riderman yabitangaje ubwo yari mu kiganiro DUNDA gica kuri KT Radio, aho umunyamakuru yamubajije niba yarasoje amashuri ye, ndetse n’uko ahuza umuziki we n’ibyo yize.

Riderman yahise asubiza umunyamakuru ko atigeze arangiza kwiga kuko yabiretse ageze mu mwaka wa kabiri wa kaminuza.

Yagize ati: “Ntabwo narangije kwiga kaminuza nk’uko bamwe babizi, nabiretse ngeze mu mwaka wa kabiri kugira ngo mpe umwanya uhagije impano yanjye y’umuziki, kuko nasanze umuziki ari ko kazi kanjye ka buri munsi.”

Yongeyeho ko yigaga ibirebana n’ubukerarugendo no kumenyekanisha ibikorwa, kandi ko abishyira mu bikorwa, ngo kuko no kuba ari kuri radiyo avuga, yazanywe no kumenyekanisha ibikorwa bye.

Uyu muraperi Riderman, ni umwe mu bahanzi binjiza amafaranga menshi mu Rwanda babikesheje umuziki, aho agenda agirana amasezerano yo kwamamaza ibigo bikomeye nka MTN, aho yanatangaje ko ari guteganya kuzasohora album nshya mu mu mpera z’uyu mwaka aho biteganyijwe ko izasohoka mu Ukuboza 2019

Riderman yagiye atwara ibihembo bitandukanye mu muziki we, aho yanatwaye igihembo cy’umuhanzi wahize abandi mu irushanwa rya Primus Guma Guma Super Star, ndetse yagiye ahamagarwa mu bitaramo byinshi, kuko aba akunzwe n’abanyarwanda benshi ndetse no hanze yarwo.

Riderman, yarakunzwe cyane mu ndirimbo ze nka Kadage, Ziramoka, Inyuguti ya R, yagiye anafatanya n’abahanzi benshi mu ndirimbo , barimo nka Urban Boys, Bruce Melody, …

Zimwe mu ndirimbo nshya za Riderman ziri hanze, harimo iyitwa Turn Up, yakoranye n’uwari umukunzi we Asina Erra, batigeze bacana uwaka kuva batandukana, hamwe n’indirimbo yise ‘Nta mvura Idahita’ yakoze wenyine, ishishikariza abantu gukora badacika intege.