Umugore yishwe azira gutsinda amatora mu mudugudu
Polisi yo mu gace ka Lwengo mu gihugu cy’abaturanyi cya Uganda iri gukora iperereza ngo imenye uwaba yihishe inyuma y’urupfu rw’umugore wapfuye hashize amasaha make atorewe kuyobora ako gace.
Nyakwigendera Hadijjah Nantale wari ufite imyaka 42 y’amavuko, yari asanzwe atuye muri aka gace ka Lwentare kari mu mujyi wa Kyazanga yishwe mu ijoro ryo kuri uyu wa Gatatu tariki ya 04 Nyakanga 2018 nyuma gato yuko yari atsinze amatora yo kuyobora aka gace ku majwi 48 mu gihe Ruubah Nandi bari bahanganye we yari yagize amajwi 4.
Daily Monitor yatangaje ko uyu mugore yishwe avuye mu gitaramo cyari cyateguwe n’umuhanzi wo muri aka gace witwa David Lutalo mu mujyi wa Kyazanga, akaba yari yagiye kwishimira insinzi ye.
Umuyobozi wa Polisi yo muri aka gace Tim Rwothengeyo, yatangaje ko hamaze gufatwa abantu babiri bakekwaho kwivuganma nyakwigendera , mu bafashwe harimo uwitwa Ibrah Sekabira w’imyaka 22 akaba n’umuhungu wa wari watsinzwe mu matora Nandi, undi wafashwe ni Bashir Mawanda w’imyaka 18.
Nandi atangaza ko umuhungu we ataraye mu rugo akaba ariyo mpamvu ari gukekwaho kugira uruhare muri uru rupfu.
Uwari umuyobozi waka gace yavuze ko amatora yabaye mu muco no mu bwisanzure kandi abakandida bose bari abo muri ako gace, agasaba inzego zibishinzwe gukora iyo bwabaga bakavumbura uwishe uyu mubyeyi nawe agakanirwa urumukwiye.
