Uko amatora y’abadepite yagenze hirya no hino ku isi-Amafoto

02/09/2018 Hirwa Patrick

Kuri iki cyumweru tariki ya 02 Nzeri 2018, ni wo munsi Abanyarwanda baba mu bice bitandukanye by’isi bitabiriye amatora y’Abadepite, mbere y’uko aya matora aba ejo ku wa mbere ku baba hano imbere mu gihugu.

Amakuru atubwira ko Abanyarwanda baba muri New-Zealand ari bo babimburiye abandi bose mu gutora abadepite.

Perezida wa Repubulika y’u Rwanda na Madamu we kuri ubu baherereye i Beijing mu gihugu cy’Ubushinwa, na bo bitabiriye igikorwa cyo gutora abadepite, igikorwa cyanitabiriwe n’Abanyarwanda batandukanye baba muri iki gihugu.

Mu gihugu cya Uganda na ho Abanyarwanda batandukanye bitabiriye aya matora. Amakuru atubwira ko Abanyarwanda bagera kuri 8,000 batuye muri Uganda ari bo bitabiriye amatora.

I Seoul muri Koreya y’Epfo na ho haba Abanyarwanda batandukanye. Aba na bo bitabiriye aya matora y’intumwa za rubanda.

Ahandi aya matora yakozwe ni mu gihugu cya Turikiya. Amatora yo muri Turkiya yafunguwe ku mugaragaro na Ambassadeur w’u Rwanda muri iki gihugu Williams Nkurunziza wabanje kurahira mbere yo gutangiza itora ku mugaragaro.

I Nairobi muri Kenya na ho batoye abadepite kuri iki cyumweru. Itora ry’i Nairobi ryabimburiwe na Ambassadeur w’u Rwanda muri iki gihugu James Kimonyo ari na we wari ukuriye site y’itora. Aya matora y’i Nairobi yanitabiriwe n’ikipe y’abakobwa ya Volley Ball yitabiriye igikombe cya Afurika kiri kubera muri iki gihugu.

Abanyarwanda baba mu Budage ba bo bitabiriye amatora uyu munsi. Muri iki gihugu amatora yabereye ku masite atatu, harimo iyari i Berlin mu murwa mukuru, i Bonn ndetse na Kaiserslautern.

Mu Buyapani ho Amatora yabereye kuri Ambassade y’u Rwanda muri iki gihugu iherereye i Tokyo mu murwa mukuru.

Muri Ethiopia ho amatora y’Abadepite yabaye saa moya z’igitondo. Ni amatora yari ahagarariwe na Ambadrice w’u Rwanda muri iki gihugu Mme Tumukunde Hope Gasatura.

Mu gihugu cy’Ubuhinde na ho habereye amatora y’Abadepite. Amatora yo muri iki gihugu yari ahagarariwe na Ambassadeur Ernest Rwamucyo ari na we wabimburiye abandi mu gutora.

Muri Sweden ho amatora yabereye i Stockholm mu murwa mukuru. Ni amatora yari ahagarariwe na Ambassadrice w’u Rwanda muri iki gihugu Mme Christine Nkulikiyinka.

Perezida Kagame mu cyumba cy’itora i Beijing.

Mme Jeanette Kagame atorera abadepite i Beijing.

Perezida Kagame na Madamu we bafatanye ifoto y’urwibutso n’abanyarwanda baba i Beijing.

Mme Christine Nkulikiyinka uhagarariye u Rwanda muri Sweden atora abadepite.

Ambassadeur w’u Rwanda mu Buhinde Ernest Rwamucyo ni we wabimburiye abandi mu gutora.

Ambassadeur w’u Rwanda muri Uganda Frank Mugambage aganira n’itangazamakuru nyuma yo gutora.

Abanyarwanda baba i Kampala mu gikorwa cyo gutora.

Ababa mu Buyapani batoreye kuri Ambassade i Tokyo.

Ikipe y’igihugu ya Volley Ball y’abakobwa yatoreye i Nairobi.

Ambassadeur w’u Rwanda muri Kenya James Kimonyo ni we wabimburiye abandi.

Muri Ethiopia amatora yari ahagarariwe na Ambassador Tumukunde Hope Gasatura.

Share on Facebook