Uganda: Hatahuwe ubwoko bushya bwa COVID-19 bubonetse bwa mbere ku Isi
Muri Uganda habonetse ubwoko bushya bwa coronavirus bubinetse ku nshuro ya mbere ku Isi, nyumany’uko iki gihuguubu ari kimwe mu bihugu bya Afurika kugeza uyu munsi biri guhangana n’inkubiri ya kabiri ya COVID-19, aho umubare w’abandura n’abapfa urushaho kwiyongera.
Minisitiri w’Ubuzima muri Uganda, Jane Acheng, yavuze ko ubukana bwa COVID-19 buri kurushaho kwiyongera ahanini biturutse ku kuba muri iki gihugu haramaze kugaragara ubundi bwoko busaga butanu.
Jane Acheng, yatangaje ko iki gihugu kiri kugenda kirushaho kugarizwa na COVID-19 ahanini biturutse ku kuba haramaze kugaragara ubwoko butanu butandukanye bwa virusi itera iki cyorezo burimo n’ubwabonetse bwa mbere muri iki gihugu buzwi nka ’B.1.617’.
Ati: “Dufite iyo muri Afurika y’Epfo, iyo mu Bwongereza, iyo mu Buhinde, iyo muri Brésil ndetse hakaniyongeraho n’iyabonetse muri Uganda. Kugira ubwoko butanu mu gihugu bidushyira mu bihe bikomeye ndetse n’ikigero abantu banduraho kirahambaye cyane”.
Amakuru dukesha Radiyo Mpuzamahanga y’Abafaransa, RFI avuga ko ubu bwoko bwagaragaye muri Uganda ari Delta (B.1.617.2 yabonetse bwa mbere mu Buhinde), Eta (B.1.525), Beta (B.1.351 yabonetse bwa mbere muri Afurika y’Epfo) Alpha (B.1.117 yabonetse bwa mbere mu Bwongereza) ndetse n’ izwi nka B.1.617 Minisitiri Jane Acheng yavuze ko yabonetse bwa mbere muri Uganda.
Jane Acheng yakomeje avuga ko uretse ubu bwoko butandukanye bwa COVID-19, Uganda inugarijwe n’ikibazo cyo kutagira umwuka wo kongerera abarwayi.
Ati: “Dufite kandi ikibazo cyo kubona umwuka mwiza wo guhumeka uhabwa abarwayi. Ibi bivuze ko tuzagira impfu nyinshi”.
Kugeza uyu munsi umubare w’abandura COVID-19 n’abahitanwa nayo ku munsi watangiye gutumbagira, urugero ni nk’aho ku wa 16 Kamena 2021 handuye abasaga 1564 abagera kuri 42 barapfa.
