UEFA Champions league: Ajax yatsindiye Tottenham Hotspur mu Bwongereza (Amafoto)

Ikipe ya Ajax Amsterdam yo mu gihugu cy’u Buholandi yateye intambwe ikomeye ishobora kuyigeza ku mukino wa nyuma wa UEFA Champions league, nyuma yo kujya gutsindira Tottenham Hotspur ibitego 2-1.

Hari mu mukino ubanza wa 1/2 cy’irangiza w’irushanwa rihuza amakipe yabaye aya mbere iwabo ku mugabane w’u Burayi wabereye kuri Stade nshya y’ikipe ya Tottenham.

Igitego cy’Umuholandi Donny Van de Beek ni cyo cyatandukanyije impande zombi. Ni igitego uyu musore w’imyaka 22 yatsinze ku munota wa 15 w’umukino, ku burangare bwa ba myugariro ba Tottenham bikanze ko yari yaraririye. Ni ku mupira mwiza yari acomekewe n’Umunya-Maroc Hakim Ziyech.

Tottenham y’umutoza Mauricio Pochettino yakoze ibishoboka byose binyuze ku basore basanzwe bafite ubunararibonye nka Eriksen, Dele Alli na Lucas Mourra; gusa inanirwa kumenera mu rukuta rw’ikipe ya Ajax rwarimo Dalley Blind na Kapiteni Matthijs de Light.

Uku ni na ko byagenze mu gice cya kabiri cy’umukino, n’ubwo umutoza wa Tottenham yakoze impinduka zitandukanye. Abasore nka Moussa Sissoko, Juan Foyt na Ben Davies binjijwe mu kibuga mu rwego rwo kongerera imbaraga ikipe yabo, gusa nta gikomeye bigeze bayifasha.

Ajax nk’ikipe ikina umupira wihuta na yo yacishagamo igashaka ibindi bitego, gusa ubwugarizi bwa Tottenham buyobowe n’Umunya-Colombia Davinson Sanchez bukaba ibamba.

Ku munota wa 77 w’umukino David Neres yashoboraga gutsindira Ajax igitego cya kabiri, gusa umupira yateye arobye umuzamu Hugo Lloris ugarurwa n’igiti cy’izamu.

Aya makipe yombi azongera guhurira mu mukino wo kwishyura uzaba ku wa 08 Gicurasi. Uzabera kuri Stade yitiriwe Nyakwigendera Johan Cruyf i Amsterdam, akaba ari na wo ugomba kugena ikipe izahurira ku mukino wa nyuma wa Champions league n’izaba yaraye irokotse hagati ya Liverpool na FC Barcelona.