UCL: Real Madrid yakubitiwe mu Burusiya, Manchester City irokoka mu minota ya nyuma

Ku munsi wa kabiri w’imikino y’amatsinda ya UEFA Champions league, ikipe ya Real Madrid yaraye itsindiwe mu gihugu cy’Uburusiya, mu gihe byasabye iminota ya nyuma y’umukino ngo Manchester City ikure amanota 3 imbere ya Hoffenheim yo mu Budage.

Umukino wa Hoffenheim na Manchester City, cyo kimwe n’uwa Young Boys na Juventus.

Ikipe ya Hoffenheim ni yo yafunguye amazamu hakiri kare cyane, ku gitego cyatsinzwe na Ishak Belfodil. Hari ku munota wa mbere w’umukino. Iki gitego cyaje kwishyurwa na Sergio Aguero ku munota wa 8 w’umukino.

Man City yakoze ibishoboka byose ngo ibone igitego cya kabiri, gusa gutera mu izamu rya Hoffeneim bikaba ikibazo. Iyi kipe y’umutoza Pep Guardiola yarokotse ku munota wa 86 w’umukino, ku gitego cyatsinzwe na David Silva. Ni nyuma yo kwambura umupira myugariro wa Hoffenheim.

Mu wundi mukino, ikipe ya Juventus itari ifite Cristiano Ronaldo, yari yasuye Young Boys yo mu Busuwisi. Ibitego 3-0 byari bihagije ngo Juventus yibonere amanota atatu. Ni ibitego byose byatsinzwe na Paulo Dybala.

Nyuma y’iyi mikino 2 yari yatangiye saa kumi n’ebyiri na 55, hakurikiyeho imikino 3 yakinwe ku isaha ya saa tatu.

Mu iri iyi mikino, ikipe ya Real Madrid yaburaga 3 b’inkingi za mwamba yari yasuye CSKA Moscow yo mu Burusiya. Iyi kipe y’i Madrid yaburaga Kapiteni wayo Sergio Ramos, rutahizamu Gareth Bale na Isco. Uyu mukino warangiye CSKA itsinze igitego 1-0. Uyu kandi wari umukino wa kane iyi kipe y’i Madrid imaze itazi uko amanota atatu asa.

Mu wundi mukino, Manchester United ya Jose Mourinho uri mu mazi abira yari yagiye i Mestalla kwa Valencia. Uyu mukino warangiye nta kipe irebye mu izamu ry’iyindi.

Indi kipe itahiriwe n’umunsi wa kabiri w’imikino ni Olympique Lyonnais. Iyi kipe yo mu Bufaransa yaherukaga kujya gutsindira Manchester City mu Bwongereza, gusa nijoro Shaktar Doneskhi yayisanze kuri Stade yitiriwe Rudoviko wa kabiri iyihatsindira igitego 1-0.

Undi mukino wahuje Bayern Munich yari yasuye Ajax Amsterdam. Uyu mukino warangiye amakipe yombi anganyije 1-1. Bayern ni yo yafunguye amazamu mbere ku gitego cya Mats Hummels, kiza kwishyurwa  Mazraoui .

Ni mu gihe kandi ikipe ya AS Roma yaherukaga gutsindwa na Real Madrid yatsinze Plzen ibitego 2-0. Ni ibitego bya Eden Dzeko na Justin Klivert.

Iyi mikino irakomeza kuri uyu wa gatatu hakinwa imikino yo kuva mu tsinda rya mbere kugeza mu rya kane.