Ubwandu bushya bwa Covid-19 bwica vuba bwageze mu Rwanda
Muri iki gihe imibare yabandura icyorezo cya coronavirus ikomeje kwiyongera ndetse n’abahitanwa nacyo ikaba ikomeje kuzamuka , Minisiteri y’Ubuzima iratangaza ko hari ibimenyetso bigaragaza ko virusi ya COVID-19 yihinduranyije izwi ku izina rya Delta yageze mu Rwanda .
Ubu bwoko bushya kandi bugira ubukana bwica vuba abantu bayanduye bafite ibindi bibazo by’uburwayi nk’uko bimaze kugaragara mu bipimo bigenda bifatwa mu Rwanda.
Minisitiri w’Ubuzima Dr. Ngamije Daniel yatangaje ko virusi ya COVID-19 yo mu bwoko bwa Delta yagaragaye mu bipimo byafashwe abarwayi ba COVID-19 mu Rwanda, kandi ko ari zo ngaruka zo kuba abantu benshi baranduye mu gihe gito kuko yandura mu buryo bwihuse.
Kuri micro ya radio y’igihugu Minisitiri Ngamije avuga ko ibipimo biri gukorwa mu Rwanda n’amakuru atangwa n’abaganga bigaragaza ko abarwayi ba COVID-19 basigaye baza bafite ibimenyetso bidasanzwe ugereranyije n’abakirwaga mu bihe byabanje.
Yagize ati ” Bamwe baza bakubwira ko bafite umutwe ukabije, bakakubwira ukuntu baba bananiwe cyane, ukuntu guhumeka bigoye ibyo ni ubwa mbere tubyumvise, bivuze ko ari bya bimenyetso by’ubukana bwa Covid-19 yihinduranyije buzwi nka Delta, ikindi ni uko ubwandu bwiyongereye mu gihe gito ku buryo abantu twabonaga mu mezi atatu twababonye gusa mu byumweru bine.”
Mu gihe abanyarwanda bakomeje guhangayikishwa n’ubwiyongere bwa COVID-19 , Minisiteri y’Ubuzima itangaza ko hagiye gushyirwaho uburyo butandukanye bwo gupima kugeza ku rwego rw’utugari n’imidugudu, bityo abakekwaho kwandura COVID-19 bagasuzumwa kugira ngo hafatwe ingamba zo kubakurikirana.
Kuyi uyu wa Kane tariki ya 8 Nyakanga, hayangajwe abarwayi bashya 911 b’icyo cyorezo, batumye abamaze kwandura icyorezo cya COVID-19 kuva cyagera mu Rwanda bageze ku 45,950.
Abamaze guhitanwa n’icyorezo cya COVID-19 kuva cyagera mu Rwanda muri Werurwe 2020 bageze kuri 521 barimo abantu 14 bambuwe ubuzima na cyo mu masaha 24 ashize, mu minsi ibiri ishze hakaba hamaze gupfa abantu 30.
Mu masaha 24 ashize kandi hakize abantu bashya 984, bityo abamaze gukira muri rusange bagera ku 30,191 bangana na 65.7% by’abatahuweho icyo cyorezo bose. Abakirimo kwitabwaho n’abaganga baba bari mu bitaro cyangwa mu ngo bagera ku 15,238 barimo 71 barembye.
Ibipimo bimaze gufatwa kuva umurwayi wa mbere yatahurwa mu Rwanda ni 1,700,200 birimo 8,350 byafashwe mu masaha 24 ashize.
Uyu munsi, abantu 74 ni bo bahawe doze ya mbere y’urukingo rwa COVID-19, bityo abamaze gukingirwa muri rusange bagera ku 392,077. Ni mu gihe kandi abantu 252,580 bamaze guhabwa doze ya kabiri y’urwo rukingo (AstraZeneca), harimo 572 bayihawe uyu munsi.
Mu gihe u Rwanda rutaragera nibura ku rugero rwa 60% bagomba gukingirwa, buri wese arasabwa kwitwararika no kubahiriza amabwiriza yo kwirinda ari yo gusiga intera ya metero, kwambara neza agapfukamunwa no gukaraba intoki kenshi bakoresheje amazi meza n’isabune cyangwa alukolo ( alcohol) yabugenewe
Ku Isi yose abamaze kwandura COVID-19 muri rusange bararenga miliyoni 186 barimo abasaga miliyoni 170 bakize ndetse na miliyoni 4 z’abantu bamaze kubura ubuzima kubera icyo cyorezo.
Yanditswe: Vainqueur Mahoro
