U Rwanda ruhombye umukinnyi wari kuzarufasha kubona intsinzi kuri Mozambique
Ku wa 1 Kamena 2023 Umutoza w’Ikipe y’ Umupira w’ Amaguru mu Rwanda Amavubi Carlos Ferrer yahamagaye abakinnyi bagomba kwitabira imyitozo mu ikipe y’ Igihugu kugira ngo bazamufashe kuzatsinda umukino azahuramo n’ Ikipe y’ Igihugu ya Mozambique izwi kwizina rya Os Mambas ku wa 18 Kamena 2023.
Mu bakinnyi 28 yahamagaye harimo umukinnyi mushya mu bwugarizi uhamagawe bwa mbere mu Mavubi ukina muri shampiyona yo muri Leta Zunze Ubumwe z’ Amerika mu ikipe ya Philadelphia Union utabashije kuzakinira Amavubi mu mukino uza a ku munsi w’ ejo kuri Stade Huye nyuma y’ aho agiriye imvune mu myitozo yakorewe kuri Kigali Pele Stadium.
Noe Uwimana akimara kuvunika mu Kagombambari yakomeje imyitozo kugeza irangiye ndetse anakomezanya n’ abandi bakinnyi mu mwiherero w’Amavubi mu Karere ka Gisagara mu Ntara y’ Amajyepfo muri Hotel Montana kugira ngo babone uko bazakorera imyitozo kuri stade Huye bazakiniraho.
Ubwo Ishyirahamwe ry’ Umupira w’ Amaguru mu Rwanda FERWAFA ryamenyeshaga Philadelphia Union ko Noe yavunitse yahise isaba ko yakoherezwa muri Amerika hakiri kare kugira ngo ahabwe ubuvuzi. Amavubi ahomba atyo myugariro wari kuzayafasha kuzibira abakinnyi ba Os Mambas kureba mu izamu ry’ u Rwanda. Noe Uwimana akaba yaraye afashe indege ya Sosiyete ya Qatar Airlines kuri uyu wa Gatanu tariki ya 16/Kamena 2023 ku isaha ya saa tanu z’ ijoro (23:00) asubira muri Leta Zunze Ubumwe z’ Amerika.
