U Burundi nabwo bwatangaje ko bugiye guca ikoreshwa ry’amashashi
U Burundi bugiye kwiyongera ku bindindi bihugu byo mu karere ka Afurika y’Uburasirazuba mu guca ikoreshwa ry’amashashi aho leta y’iki gihugu ivuga ko igiye gutangira igikorwa cyo guca ikoreshwa ry’ amashashi mu gihe cy’amezi 18 ari imbere.
Umubare w’ibihugu ku mugabane wa Afurika bivuga ko byaciye ikoreshwa n’icuruzwa ryamashashi ukomeje kuzamuka, Mu mwaka wa 2020, leta y’u Burundi nayo yatangaje ko izaba yamaze guca ikoreshwa ry’amashashi, BBC ivuga ko mu itegeko-teka rya Perezida Pierre Nkurunziza iki kinyamakuru cyabonye rivuga ko ribuza “gukora, kwinjiza mu Burundi, kubika, kugurisha no gukoresha amashashi n’ibindi bintu byose byo gupfunyikamo bikoze muri plastike.”
Muri iri tegeko-teka rya Perezida Nkurunziza, ryongeraho ko hashobora kubaho isonerwa mu gukoresha amashashi “ashobora gukorwamo ibindi bintu, amashashi akoreshwa kwa muganga ndetse no mu nganda no mu gupfunyika imiti muri farumasi.”
Ibihugu birenga 40 ku isi bivuga ko byamaze guca ikoreshwa ry’amashashi. Ibi birimo u Rwanda, Kenya ,Maroc, Afurika y’Epfo, Botswana na Eritrea byaciye burundu ikoreshwa ry’amashashi mu rwego rwo kurengera ibidukikije.
