Tuyisenge Jacques yongeye kwerekana ko ari we mizero ya Gor Mahia
Umunyarwanda Jacques Tuyisenge yongeye guha ibyishimo abafana ba Gor Mahia, nyuma yo gufasha ikipe yabo gukura amanota atatu kuri Bandari FC.
Hari mu mukino wa shampiyona ya Kenya wabereye kuri Stade yitiriwe Mzee Moi wahoze ari umukuru w’igihugu cya Kenya.
Tuyisenge Jacques yatsinze igitego kimwe rukumbi cyabonetse muri uyu mukino munota wa 92. Ni igitego yatsinze n’umutwe. Iki gitego Gor Mahia yakibonye yiyushye akuya kuko yari yazonzwe n’umuzamu wa Bandari FC watinzaga umukino buri kanya.
Uretse kuba Tuyisenge Jacques yafashije Gor Mahia kubona amanota atatu uyu munsi, yanafashije iyi kipe ye kwisubiza umwanya wa mbere ku rutonde rwa shampiyona ya Kenya.
Ni umwanya yafashe iwambuye Sofapaka.
Gor Mahia yaherukaga kunganya na Kakamega Homeboyz cyo kimwe na Urinzi Stars, iyoboye shampiyona ya Kenya n’amanota 49. Iracyanafite imikino itatu y’ibirarane itakiniye ku gihe kuko yari ihagarariye Kenya mu mikino ya CAF Confederations Cup.
