TPLF yikomye ibihugu bya Turkiya, Iran na Leta Zunze Ubumwe z’Abarabu
Umutwe wa TPLF wikomye ibihugu bya Turkiya, Leta Zunze Ubumwe z’Abarabu (UAE) na Iran; usaba Umuryango w’Abibumbye kubisaba guhagarika ubufasha bwa gisirikare biha Ethiopia.
Ni ibikubiye mu ibaruwa Debretsion Gebremichael uyobora uriya mutwe aheruka kwandikira Umunyamabanga Mukuru wa Loni, Antonio Guterres.
Muri iyi baruwa umuyobozi wa TPLF yavuze ko biriya bihugu uko ari bitatu bifite uruhare mu ntambara ikomeje hagati yabo na Leta ya Ethiopia, kuko ngo biyiha intwaro n’indege za nto z’intambara zizwi nka ‘drones’.
Yasabye Guterres kugira inama ibi bihugu guhagarika ubu bufasha kubera ko intwaro bitanga zigira uruhare mu bitero bigabwa ku basivili.
Ati: “Izi ntwaro zikoreshwa mu kugaba ibitero ku basivili kandi ibitero ku basivili byica itegeko mpuzamahanga ribarengera, zinakoreshwa mu gukomeza intambara, bigakomeza guhungabanya umutekano wa Ethiopia.”
The East African ivuga ko ibi bihugu byose uko ari bitatu bihakana uruhare bishinjwa muri iyi ntambara ya Ethiopia, ahubwo Turkiya yo yijeje kunga impande zishyamiranye, ariko nyuma iza kugirana amasezerano y’ubufatanye mu bya gisirikare n’umutekano na Leta.
Gebremichael yandikiye Guterres mu gihe ingabo za Leta ziyobowe na Minisitiri w’Intebe Abiy Ahmed ku rugamba, zivuga ko zimaze kwigarurira uduce twinshi twari twarafashwe na TPLF n’indi mitwe yitwaje intwaro bifatanyije. Utu duce turi mu karere ka Amhara na Afar.
