TPLF yashyizeho akayabo nk’ishimwe ku wayirangira aho Abiy Ahmed aherereye
Ikinyamakuru gikoranira bya hafi n’inyeshyamba z’ishyaka rya TPLF, cyashyizeho ishimwe ringana miliyoni 11 z’Ama-Bir (Frw miliyoni 230) ku watanga amakuru y’aho Abiy Ahmed aherereye.
Ni nyuma y’uko Abiy usanzwe ari Minisitiri w’Intebe wa Ethiopia ku wa Mbere w’icyumweru gishize yatangaje ko agiye kuyobora ingabo za Ethiopia mu rugamba zimaze umwaka zihanganyemo na TPLF.
Ikinyamakuru cyitwa Tigray Media House ni cyo cyashyizeho kariya kayabo ku watunga agatoki k’aho Abiy Ahmed aherereye.
Tigray People Liberation Front (TPLF), a TPLF affiliated media has offered 11 million birr ($230,000) for information on the whereabouts of the prime minister.#Ethiopiahttps://t.co/eJEbXNT1JX
— Namo Kiyya (@EvTeche) November 26, 2021
Iki kinyamakuru gisanzwe gikorera kuri internet, gifite icyicaro muri Leta Zunze Ubumwe za Amerika, kikaba gikunze gukora inkuru ku ntambara kigendeye ku kuntu TPLF ibibona.
Cyashyizeho aya mafaranga mu kiganiro cyatambukaga mu buryo bw’ako kanya (live) ku muyoboro wacyo wa YouTube, tariki 23 Ugushyingo mu rurimi rw’uru Amharic ruvugwa mu gace ka Amhara.
Umunyamakuru wakoraga iki kiganiro yagize ati: “Dukeneye amakuru gusa ku rugamba ariho, tuzishyura twishimye miliyoni 11 z’Ama-birr.”
Aya mafaranga arangana n’ayo Leta ya Ethiopia yashyiriyeho abayobozi ba TPLF mu Ukuboza 2020, nyuma y’ukwezi intambara itangiye.
Amakuru avuga ko nyuma y’aho Abiy Ahmed agiriye ku rugamba ku wa Kabiri w’icyumweru gishize ingabo za Ethiopia zatangiye kwigarurira twinshi mu duce twari twarigaruriwe n’inyeshyamba.
Ku Cyumweru gishize Radiyo na televiziyo bya Ethiopia byemeje ko izi ngabo zigaruriye Umujyi wa Chifra uherereye mu Ntara ya Afar, nyuma y’uko abarwanyi ba TPLF bari bamaze gusubira inyuma.
