Tour du Rwanda: Umunya-Pologne Przemyslaw Kasperkiewicz yegukanye agace ka gatandatu

Umunya-Pologne Przemyslaw Kasperkiewicz ukinira ikipe ya Delko Mareseille Province yo mu gihugu cy’u Bufaransa, yegukanye agace ka gatandatu k’isiganwa mpuzamahanga rizenguruka u Rwanda kavaga i Musanze kerekeza i Nyamata mu Bugesera.

Abasiganwa 66 basigaye mu isiganwa bakoze intera ireshya na Kilometero 120.

Kasperkiewicz yasesekaye mu mujyi wa Nyamata ayoboye igikundi cy’abakinnyi barimo na Valens Ndayisenga w’Umunya-Rwanda.

Umunyarwanda waje hafi mu gace k’uyu munsi ni Mugisha Samuel watwaye Tour du Rwanda iheruka. Uyu musore ukomoka ku Mukamira i Nyabihu yageze i Nyamata ari uwa karindwi. Undi Munyarwanda witwaye neza ni Valens Ndayisenga wahageze ari ku mwanya wa munani.

Ni mu gihe Mugisha Moise yahawe umwambaro w’umukinnyi uterera imisozi neza kurusha abandi. Ni umwambaro uyu musore yari yanambitswe ku munsi w’ejo ubwo abasiganwa bavaga i Karongi berekeza i Musanze.

Mu gihe habura uduce tubiri ngo Tour du Rwanda ya 2018 isozwe, Umunya-Erithrea Kudus Merhawi ukinira ikipe ya Astana Pro Team yo muri Kazakhstan aracyambaye umwambaro w’umuhondo.