The Ben yatunguye abitabiriye igitarano cya Rema Namakula(Amafoto)
Umuhanzi Mugisha Benjamin wamamaye nka The Ben yatunguranye agaragara mu gitaramo ‘Melodies of Love’ cya Rema Namakula cyabereye mu busitani bwa hoteli yitwa Sheraton.
Iki gitaramo cyabaye mu ijoro ryo ku wa 23 Gashyantare 2024. Ubwo cyari kigeze hagati, The Ben yatunguranye azamuka ku rubyiniro afatanya n’uyu mugore kuririmba indirimbo ‘This is love’ bakoranye.
The Ben wari wambaye ikote n’ipantaro bisa n’ibyo yari yambaye ubwo yasezeranaga mu Murenge na Uwicyeza Pamella, akigera ku rubyiniro abantu bavugije induru ari benshi bagaragaza ko bamwishimiye.
Kugaragara ku rubyiniro rw’igitaramo cya Rema Namakula kwa The Ben byari nko kumwishyura kuko uyu mugore aherutse kwitabira igitaramo yakoreye i Kampala aho yari yatumiwe n’umunyarwenya Alex Muhangi.
Indirimbo ‘This is love’ The Ben yakoranye na Rema Namakula yasohotse ku wa 30 Ukuboza 2020. Mu myaka itatu imaze ku rubuga rwa Youtube imaze kurebwa n’abarenga miliyoni umunani.
Uretse The Ben, igitaramo cya Rema Namakula cyagaragayemo abahanzi barimo B2C n’abandi batandukanye bari bagiye gushyigikira uyu mugore uri mu bakunzwe bikomeye muri Uganda.
