Tchad:Hatangajwe uwegukanye amatora y’umukuru w’igihugu

Jenerali Mahamat Déby, yatangajwe ko ari we watsinze amatora y’umukuru w’igihugu cya Tchad,byamuhesheje uburenganzira bwo gufata ubutegetsi mu nzira y’amategeko.

Jenerali Déby yatsinze ku majwi 61.3%, nk’uko bitangazwa na komisiyo ishinzwe gutegura no guhagararira amatora mu majwi y’agateganyo yatangaje, mu gihe mukeba we,Minisitiri w’intebe,Succes Masra, yabonye 18.53%.

Mbere y’aho, Masra yari yatangaje ko ari we watsinze ayo matora “ku rugero runini”, ariko ko “intsinzi y’abaturage” yibwe.

Jenerali Déby w’imyaka 40, yashyizwe ku butegetsi n’igisirikare nyuma y’aho se,Idriss Déby Itno, yiciwe ku rugamba n’inyeshamba mu kwa kane 2021.

Intsinzi ye isobanura ko ubutegetsi bw’umuryango wa Déby umaze imyaka 34 ku butegetsi izakomeza.

Maréchal Déby wafatwaga nk’indwanyi kabuhariwe yagiye ku butegetsi nyuma yo guhirika Hissène Habré mu 1990, akomeza kuyobora Tchad kugeza ku munsi yapfiriyeho. Yari umwe mu bamaze igihe kinini ku mwanya wa Perezida muri Afurika.

Ibyavuye mu matora yabaye ku wa mbere byatangajwe ibyumweru bibiri mbere y’igihe cyari giteganyijwe.

Byitezwe kwemezwa n’inama nkuru ishinzwe itegekonshinga.

Nibwo bwa mbere muri Tchad habayeho kubisikana ku butegetsi mu mahoro kuva yigaranzuye ubukoloni bw’Ubufaransa ikabona ubwigenge mu 1960.