Tanzania yatangaje umurwayi wa COVID-19 wavuye mu burundi kandi butangaza ko itarahagera

Minisitiri w’ubuzima muri Tanzania yatangaje ko habonetse umurwayi mushya wa coronavirus, abayanduye ubu bakaba bamaze kuba 13.

Mu kiganiro n’abanyamakuru, minisitiri Ummy Mwalimu yavuze ko uyu bayibonyemo ari umushoferi w’amakamyo winjiye muri Tanzania aciye ku mupaka uyihuza n’u Burundi.

Ati: “Uyu mushoferi w’amakamyo yinjiye mu gihugu aciye ku mupaka wa Kabanga uri hagati ya Tanzania n’u Burundi kuko asanzwe atwara amakamyo hagati ya DR Congo, Burundi na Tanzania”.

Yatangaje ibi mu gihe u Burundi butangaza ko Coronavirus itaragera mu gihugu cyabo ngo kubera ko basenga Imana cyane bityo ko itakwemera kubateza icyorezo.

Kabanga ni agace kari mu karere (district) ka Ngara mu Ntara ya Kagera muri Tanzania, aka gace gahana imbibi n’intara ya Kirundo mu burasirazuba bushyira amajyaruguru y’u Burundi.

Mu Burundi, ku wa kabiri nijoro minisiteri y’ubuzima yasohoye itangazo rivuga ko nta murwayi ufite virus ya Covid-19 uraboneka mu gihugu.

Ku bijyanye naya makuru yatangajwe na Tanzania, Minisiteri y’ubuzima mu Burundi yanditse kuri Twitter ko “leta y’u Burundi iri gukora iperereza ku makuru y’uwo mushoferi w’amakamyo bivugwa ko yavuye mu Burundi”.

Uwo bayisanzemo muri Tanzania, ari mu ntara ya Kagera mu burengerazuba bwa Tanzania nk’uko minisitiri Mwalimu abivuga, ntiyatangaje andi makuru arambuye.

Madamu Ummy Mwalimu yavuze ko abantu bose babonyemo Covid-19 muri Tanzania umwe gusa muri bo ari we udaheruka mu mahanga wahuye n’uwavuye mu mahanga.

Umuntu umwe mu bari barwaye coronavirus muri Tanzania yarayikize neza, uwo ni umugore witwa Isabella Mwampampa, ubu ugiye kuva mu kato.

Tanzania imaze gufata ibipimo by’iyi ndwara 273, muri byo 13 nibyo basanzemo iyi virus naho abagera ku 111 bari mu kato ahantu hatandukanye habugenewe mu gihugu.

BBC