Tanzania: Minisitiri Augustine Philip Mahiga yapfuye urw’amayobera
Uwari Minisitiri ushinzwe amategeko n’Itegeko Nshinga muri Tanzania , Augustine Philip Mahiga yapfuye.
Ibiro bya Perezida wa Tanzania byatangaje ko Mahiga w’imyaka 74 yazize uburwayi kuri uyu wa Gatanu tariki 1 Gicurasi 2020.
Itangazo rivuga ko Mahiga yarwaye mu buryo butunguranye ari iwe mu mujyi wa Dodoma agahita ajyanwa kwa muganga ariko akagezwayo yapfuye.
Perezida John Pombe Magufuli yihanganishije umuryango wa Mahiga, avuga ko yari umuntu ukunda akazi n’igihugu.
Philip Mahiga yari umurwanashyaka w’ishyaka riri ku butegetsi CCM. Yabaye Minisitiri w’Ububanyi n’amahanga wa Tanzania kuva mu 2015 kugeza mu 2019.
Uwo mwanya yawuvuyeho muri Werurwe umwaka ushize asimbuwe na John Palamagamba Kabudi.
Augustine Mahiga yabaye intumwa ya Tanzania mu muryango w’abibumbye kuva mu 2003 kugeza mu 2010, yabaye kandi intumwa yihariye n’umuyobozi w’ibiro bya Loni muri Somalia (2010 – 2013).
