Tanasha yanyomoje amakuru y’uko Diamond yamutanye umwana baheruka kubyarana
Umunyamakuru Tanasha Dona usanzwe ari umukunzi w’umuhanzi Diamond Platnumz, yabeshyuje ibitangazamakuru biheruka gutangaza inkuru ivuga ko Diamond yamutanye umwana baheruka kubyarana.
Mu minsi ishize nib wo hakwirakwiye inkuru ivuga ko uyu mugore na Diamond bibarutse. Ni inkuru yasamiwe jehuru n’ibinyamakuru bitandukanye byandika ku myidagaduro.
Gusa ikiriho ni uko Diamond na Tanasha we batigeze bashyira ku karubanda inkuru y’uyu mwana cyangwa ngo bemeze ko bamwibarutse. Ibi byatumye ibinyamakuru bitandukanye bitangira gutangaza ibihuha bitandukanye kuri Diamond n’umukunzi we.
Bimwe mu bitangazamakuru byandikira kuri Internet byanditse ko Diamond yataye Tanasha n’umwana we, bijyanye n’uko yari ahugiye mu bitaramo bya Wasafi Festival 2019 byabereye mu bice bitandukanye by’igihugu cya Tanzania.
Abanditse izi nkuru bagenderaga ku magambo yavuzwe na Zari wigeze kubanaho na Diamond nk’umugabo n’umugore, y’uko Tanasha atazatinda kubona ko Diamond ari umuhemu.
Tanasha abinyujije mu butumwa butandukanye yanyujije kuri Instagram, yabwiye abanditse ziriya nkuru ko ubuzima bwe bumeze neza cyane.
Ati” Umugore ntabwo ashobora kugira ubuzima bwe bwite hatariho ibinyamakuru binini n’ibito bihimba inkuru z’ibinyoma byambaye ubusa 100%…urebye ibintu bibi bandika ku mwana wanjye bagambiriye gukomeza ibintu, wibaza icyateye iyi si…Ndashima Imana kubera ko nyuma y’ibi byose meze neza.”
Muri Nyakanga uyu mwaka nib wo Diamond na Tanasha bahishuye ko bateganya kwibaruka umwana wa kane w’uyu muhanzi, dore ko afite babiri yabyaranye na Zari n’undi yabyaranye na Hamisa Mobetto.
