Sunrise FC biyisabye imyaka 4 ngo itsinde APR FC-AMAFOTO
Kuri uyu wa Gatatu tariki 23 Mutarama, shampiyona y’u Rwanda, ‘AZAM Rwanda Premier League’ yari yakomeje hakinwa umukino w’ikirarane w’umunsi wa 7 wahuje Sunrise na APR FC.
Ni umukino wabereye i Nyagatare kuri stade Amabati urangira ari ibitego 3-2. Hari hashize imyaka 4 APR FC idatsindwa na Sunrise FC.
Sunrise FC ni yo yafunguye amazamu ku munota wa 4 w’umukino, ku makosa ya myugariro wa APR FC, kapiteni wa Sunrise FC Sova Ally Musa yahaye umupira mwiza rutahizamu ukomoka muri Nigeria, Babua Samson, maze asigarana n’umunyezamu Kimenyi Yves, atsindira Sunrise igitego.
Ombolenga Fitina yazamukanye umupira awutera neza mu rubuga rw’amahina ugera ku mutwe wa Sugira, na we awuha neza Muhadjirimaze atajuyaje awuboneza mu rushundura, APR FC ibona igitego cyo kwishyura ku munota wa 38.
Ku munota wa nyuma w’igice cya mbere, Sunrise FC yashoboraga kubona igitego cya kabiri ariko Ombolenga arahagoboka umupira arawurenza igice cya mbere gihita kirangira bikiri igitego 1-1.
Ku munota wa 5o w’umukino, Musa Ally Sova yazamukanye umupira , ateye mu izamu Kimenyi Yves aratabara arenza umupira ujya muri Koruneri iterwa neza ishyirwa ku mutwe wa Uwambajimana Leo Kawunga atsindisha umutwe igitego cya kabiri cya Sunrise FC maze APR FC isigara irwana no kwishyura kuko umutoza Jimmy Mulisa yahise yongera amaraso mashya mu busatirizi agakuramo Byiringiro Lague hakinjira Issa Bigirimana.
Issa Bigirimana akigera mu kibuga yari yishyuriye APR FC ku mupira yari ahawe na Sugira Ernest ariko umupira ukagarurwa n’umutambiko w’izamu. Ntibyatinze kuko ku munota wa 68 Savio Nshuti Dominique yatsindiye APR FC igitego cyo kwishyura.
Sunrise FC yakinnye uyu mukino idafite rutahizamu wayo Jules Ulimwengu umaze kuyitsindira ibitego 9 muri 17 Sunrise FC ifite.
Uyu rutahizamu w’imyaka 19 ukomoka i Burundi yasanze bagenzi be mu ikipe y’igihugu y’abatarengeje imyaka 20 izitabira igikombe cya Afurika kizabera muri Niger giteganyijwe tariki 24 Gashyantare 2019.
Sunrise FC yakomeje kotsa igitutu iyi kipe y’ingabo z’igihugu maze ku munota wa 89 Babua Samson atsindira Sunrise FC igitego cya gatatu kikaba icya 2 yari atsinze muri uyu mukino.
Sunrise FC ibaye ikipe ya mbere yinjije byibuze ibitego 3 mu izamu rya APR FC muri shampiyona kuva tariki ya 3 Gicurasi 2016 ubwo yatsindwaga 4-0 na Rayon Sports.
Abakinnyi 11 babanza mu kibuga ku mpande zombi
Sunrise FC: Itangishatse Jean Paul, Nzayisenga Jea D’Amour, Niyonshuti Gad, Rubibi Bonk, Niyonkuru Vivien, Uwambazimana Leon, Sinamenye Cyprien, Kavumbagu Junior, Babuwa Samson Erick Mambo na Emmanuel Moussa Ally
APR FC: Kimenyi Yves, Ombolenga Fitina, Emmanuel Imanishimwe, Michel Rusheshangoga, Buregeya Prince, Mugiraneza Jean Baptiste Migi, Imran Nshimiyimana, Savio Nshuti, Muhadjiri Hakizimana, Byiringiro Lague na Sugira Ernest.
[team_standings 32825]
