Sudani: 10 batawe muri yombi bashaka guhirika akanama ka gisirikare kari ku butegetsi

Umuvugizi w’akanama ka gisirikare kari ku butegetsi muri Sudani Jenerali Jamal Omar avuga ko aka kanama kaburijemo igikorwa cyo kugerageza guhirika ubutegetsi buriho nyuma y’ihirikwa ry’uwari perezida Omar Al Bashir.

Jenerali Jamal Omar yatangarije televiziyo y’igihugu ko abantu barenga icumi batawe muri yombi muri bo hakaba harimo abakiri ku kazi muri iki gihe n’abari mu kihuruko cy’izabukuru bo mu gisirikare no mu rwego rw’igihugu rw’iperereza.

Yagize ati: “Twabonye ibiteye akaga, byari bimaze igihe biteye impungenge mu mutekano w’iki gihugu, bitewe n’itsinda ry’abantu badashaka ibyo rubanda yifuza”.

Yongeyeho ko iryo gerageza ryo guhirika ubutegetsi ryari rigamije kuburizamo amasezerano y’isaranganya ry’ubutegetsi ari kunonosorwa hagati y’inama ya gisirikare n’abigaragambya.

Ntibizwi neza igihe ayo masezerano azashyirirwaho umukono.

Umusesenguzi kuri Sudani Ahmed Kodouda yatangaje ko iri ribaye igerageza rya gatatu ryo guhirika ubutegetsi inama ya gisirikare muri Sudani itangaje ko yaburijemo.

Yongeyeho ati: “Abantu benshi ntibari gushira amakenga ibyatangajwe [n’inama ya gisirikare], ariko mu by’ukuri hari abantu bashishikariye guhungabanya iyi nzibacyuho”.

Sudan ntiragira ituze kuva mu kwezi kwa kane nyuma y’ihirikwa ku butegetsi kwa Perezida Omar al-Bashir, wari ubumazeho imyaka 30, akaza kubuvanwaho n’igisirikare ku gitutu cy’abigaragambya.

Abaturage bakomeje kwigaragambya bamagana ko ubutegetsi bwahise bufatwa n’abasirikare bakanga kubuha abasivile.

Taliki ya 5 Nyakanga 2019, nibwo akanama ka gisirikare kari ku butegetsi bw’inzibacyuho muri Sudani, kemeranyije n’abatavuga rumwe nako uburyo impande zombi zigomba kugira uruhare mu miyoborere y’iki gihugu.