Se wa Diamond bamaze igihe badacana uwaka yagize icyo amusaba

Mu gihe hamaze iminsi havugwa amakuru y’uko umuhanzi Diamond Platnumz yaba yitegura kurushinga n’umunyakenyakazi Tanasha Donna Oketch, Se w’uyu musore wakunze kutumvikana nawe yamusabye ikintu yazamukorera kikamushimisha mu buzima bwe bwose.

Uyu musaza yasabye umuhungu we ko yazamutumira mu bukwe bwe ateganya gukora muri Gashyantare 2019, kuko byibuze ibi byazaba bimwe mubizatuma agira ibyishimo mu buzima bwe.

Diamond na se Juma Abdul bakunze kugirana amakimbirane hagati yabo bigaragara ko uyu muhanzi asa n’uwamaze guca ukubiri nawe ahubwo arushaho gukunda nyina unakunze kumugira inama muri gahunda ze hafi ya zose.

Ibi byatumye Juma Abdul muri 2018 abwira Diamond Platnumz ko atifuza ko yazakandagira no ku mva ye.

Mu kiganiro yagiranye na Showbiz Xtra, Abdul Juma yavuze ko yazishima kurusha iminsi yose amaze ku Isi naramuka atumiwe mu bukwe bw’umuhungu we n’Umunyakenyakazi Tanasha Donna ‘Zahara Zaire’.

Yashimangiye ko byazaba ikimenyetso cy’uko Diamond amwubaha nk’umubyeyi we nubwo hagati yabo havutse amahari mu myaka yatambutse kubera ibibazo byo mu muryango wabo.

Yagize ati “Ntabwo arambwira iby’ubukwe bwe, nanjye mbyumvana abantu gutyo, igikuru ni uko icyifuzo cyanjye kuri we ari uko Imana yazaha umugisha urugo rwe. Ikindi ariko nkifuza ko atakwibagirwa kuntumira, natantumira nzamenya ko ansuzugura cyane, nzamererwa nabi.”

Uyu musaza amaze iminsi atakamba ko afite ubukene bumuhangayikishije, mu gihe umuhungu we atunze Miliyali ariko nta n’ayo kurya ashobora kumuha.

Juma ntakibana na nyina wa Diamond nyuma y’amakimbirane bakunze kugirana bigatuma batandukana buri wese agaca inzira ze, ndetse nyina wa Diamond we yamaze no gushakana n’undi mugabo.

Juma Abdul ubu asigaye yibana ahitwa Magomeni mu Mujyi wa Dar es Salaam.