Rwanda: Abatarikingije bafatiwe ingamba zikomeye mu byerekeranye no gukora ingendo

Mu mabwiriza mashya Guverinoma y’u Rwanda yatangaje,kuwa Gatanu tariki 7 Mutarama 2022, mu gukomeza guhangana na Covid-19, abagenzi bo kuri moto n’amagare hamwe n’ababatwaye,bose bagomba kuba barikingije Covid-19, abatazabyubahiriza bakazafatirwa ibihano.

Muri aya mabwiriza kandi, imodoka rusange zitwara abagenzi barasabwa gutwara gusa abagenzi bikingije COVID-19, abatazabyubahiriza bakazafatirwa ibihano.

Guverinoma yatangaje kandi ko amashuri azafungura hakurikijwe ingengabihe isanzweho.Amabwiriza arambuye kuri iyi ngingo azatangazwa na Minisiteri y’Uburezi.”

Abagenzi binjira mu gihugu bazakomeza gusabwa kuba bataranduye Covid-19 bigaragazwa n’icyemezo cy’uko bipimishije hakoreshejwe PCR kandi bagashyirwa mu kato k’iminsi itatu bakigera ku mupaka.

Inzego za leta zo zizakomeza gukoresha 15% by’abakozi ubusanzwe bakorera mu biro hanyuma abandi bakorere mu ngo. Ni mu gihe ku bikorera bo, umubare w’abemerewe gukorera mu biro ari 30% by’abakozi n’ubusanzwe bahakorera.

Abikorera bategetswe “gukora ku buryo abakozi bose baba barikingije Covid-19 mu buryo bwuzuye”. Rivuga kandi ko Minisiteri y’Ubuzima ishobora gufunga by’agateganyo inyubako zaba iza leta cyangwa iz’abikorera mu gihe bigaragaye ko habonetse umubare munini w’abanduye Covid-19”.

Abemerewe kujya mu nsengero mu Mujyi wa Kigali ntibagomba kurenga 30% by’ubushobozi bwazo mu gihe mu bindi bice ari 50%. Hose bagomba kuba barikingije Covid-19.

Naho mu bukwe, kwiyakira birabujijwe. Gusaba no gukwa cyangwa se gusezerana imbere y’ubuyobozi no mu nsengero hemewe abantu batarenze 40 kandi nabwo bikaba byabanje kumenyeshwa ubuyobozi.

Muri restaurant, abakiliya bikingije Covid-19 ni bo bemewe gusa na ho mu tubari gufunga kwatwo ni saa mbili.