Rwanda: Abanduye coronavirus babaye 191, bane biyongera kubamaze kuyikira
Kuri iki Cyumweru tariki ya 26 Mata 2020,Minisiteri y’Ubuzima yatangaje ko abantu bane bakize Coronavirus mu gihe umunani basanganywe ubu bwandu mu bipimo 1025 byafashwe, bituma umubare w’abamaze kwandura mu Rwanda ugera ku 191.
Umubare w’abamaze gukira Coronavirus kuva umurwayi wa mbere abonetse mu Rwanda ku wa 14 Werurwe 2020, ni 92 barimo bane basezerewe uyu munsi.
Itangazo rya Minisiteri y’Ubuzima ryerekanye ko mu bantu 191 bamaze gusanganwa Coronavirus mu Rwanda, barimo ‘umunani bashya’ babonetse mu bipimo byafashwe uyu munsi.
Abasanganywe ubwandu biganjemo abakora mu bijyanye n’ubwikorezi cyane mu batwara amakamyo yambukiranya imipaka n’abo bakorana.
Kuri ubu abarwayi 99 nibo bakiri mu bitaro aho bitabwa n’abaganga kandi ‘bose bavurirwa ahantu habugenewe kandi boroherwa.’ Nta murwayi n’umwe uraremba cyangwa ngo yitabe Imana.
Minisiteri y’Ubuzima yibukije abaturage gutanga amakuru ku wo bazi yahuye n’uwanduye Coronavirus kugira ngo yitabweho bikwiye.
Yagize iti ‘‘Umuntu wese wanga gutanga amakuru arebana n’abahuye n’umurwayi wa Coronavirus cyangwa agahisha ibimenyetso byayo aba ashyize ubuzima bwa benshi mu kaga kandi abihanirwa n’amategeko.’’
Abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kuguma mu rugo, kwambara udupfukamunwa mu gihe umuntu avuye mu rugo cyangwa ahuye n’abantu benshi mu nsisiro cyangwa ahatuye imiryango myinshi.
Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.
Umuntu wese ashobora kwipimisha akoresheje telefoni akanda *114# agakurikiza amabwiriza. Ugaragaza ibimenyetso bya Coronavirus asabwa guhamagara telefoni itishyurwa ya 114, cyangwa akohereza ubutumwa bwa WhatsApp kuri +250788202080 cyangwa akitabaza umujyanama w’ubuzima umwegereye.
Icyorezo cya COVID-19, gituruka ku gakoko ka Coronavirus cyatangiriye mu Mujyi wa Wuhan mu Bushinwa mu Ukuboza 2019; kuri ubu 2 976 940 bamaze kucyandura ku Isi yose, barimo 206 133 cyahitanye na 874 554 bamaze kugikira.
