Robertinho utegerejwe muri Rayon Sports aragera i Kigali kuri uyu wa Kabiri
Umunya-Brazil Roberto Oliveira Gonçalves do Carmo umaze amezi abiri yibereye iwabo muri Brazil, ategerejwe i Kigali kuri uyu wa kabiri aho aje gukomezanya na Rayon Sports nk’umutoza mukuru wayo.
Amashusho Robertinho yashyize ku rubuga rwe rwa Instagram amugaragaza ari ku kibuga cy’indege iwabo muri Brazil, yitegura guhaguruka agaruka hano mu Rwanda.
Mu minsi ishize uyu mutoza yari yatandukanye na Rayon Sports mu buryo bweruye nyuma yo kutumvikana na yo mu byo kongera umushahara, gusa yongera kwiyunga na yo nyuma yo gutakamba agaragaza buryo ki afitiye urukundo iyi kipe na benshi mu Rwanda.
Rayon Sports byarangiye imwumvise inahita imwoherereza amafaranga y’itike y’indege.
Byitezwe ko uyu mutoza azashyira umukono ku masezerano amaze kugera mu Rwanda. Nta gihindutse kandi Robertinho arazanira Rayon Sports abakinnyi babiri bakomoka muri Brazil yari amaze iminsi ayirambagiriza. Ni abakinnyi barimo umwe ukina nka rutahizamu n’undi ukina hagati mu kibuga.
Robertinho wongereye amasezerano muri Rayon Sports yabashije kwitwara neza umwaka ushize w’imikino aho yahaye iyi kipe ibikombe bitatu birimo igikombe cya shampiyona, igikombe cy’agaciro n’igikombe cy’intwali.
