Real Madrid yamaze kubona umusimbura wa Zidane
Ikipe ya Real Madrid yamaze kwemeza Julen Lopetegui usanzwe ari umutoza w’ikipe y’igihugu ya Espagne nk’umutoza wayo mukuru, akaba asimbuye Zinedine Zidane wafashe icyemezo cyo gusezera muri iyi kipe mu kwezi gushize.
Uyu mugabo w’imyaka 51 y’amavuko yasinyanye na Real Madrid amasezerano y’imyaka itatu.
Aya makuru yaje atunguranye kuko uyu mutoza atari ku rutonde rw’abahabwaga amahirwe yo gusimbura Zinedine Zidane wasezeye muri iyi kipe nyuma yo kuyihesha UEFA Champions league ya 13 atsinze Liverpool ku mukino wa nyuma ibitego 3-1.
Lopotegui wahoze ari umuzamu yaciye muri Real Madrid nk’umukinnyi nyuma aza kwerekeza muri mukeba wayo w’ibihe byose, FC Barcelona.
Uyu mugabo yanatoje Real Madrid nto hagati ya 2008 na 2009, mbere y’uko afata inshingano zo gutoza ikipe y’igihugu nto ya Espagne.
Mu kwezi gushize kandi ni bwo uyu mugabo wahoze anatoza Porto yari yasinye amasezerano yo gukomeza gutoza ikipe y’igihugu ya Espagne kugeza mu 2020, gusa Terefoni yaturutse muri Real Madrid yatumye ahagarika gutoza iyi kipe.
Magingo aya Julen Lopepetegui ari kumwe n’ikipe y’igihugu ya Espagne yitabiriye imikino y’igikombe cy’isi kigomba gutangira kuri uyu wa kane mu gihugu cy’Uburusiya.
